Չգտնվեց մեկ Շարմազանով, որ ասեր՝ ահաբեկչություն եք անում

«Կրակել ոստիկանի վրա, նշանակում է՝ կրակել պետական սիմվոլի վրա, ժողովրդի վրա ու պետության արժանապատվության վրա: Եթե ուզում ենք ունենալ հանդուրժող, քրիստոնեական ու ժողովրդավար պետություն, բոլորս պետք է հարգենք մեր պետության սիմվոլին: Ում դուրը կգա, ում դուրը չի գա, պիտի ասեմ՝ այո′, տեղի ունեցածն ահաբեկչություն է: Պետք է սթափվենք: Այն հասարակությունը, որը ոստիկանի դերը չի գնահատում, այդ հասարակությունն ապագա չունի»,- ասել է ԱԺ փոխնախագահ Էդուարդ Շարմազանովը ՀՀ ոստիկանության ՊՊԾ գնդի տարածքում տեղի ունեցած փոխհրաձգության հետևանքով ծանր վիրավորում ստացած և 27 օր անց մահացած՝ ոստիկանության ենթասպա, 45-ամյա Գագիկ Մկրտչյանի հուղարկավորության ժամանակ։

Այն, որ ՊՊԾ գնդի գրավման օրերին խորապես ցավալի դեպքեր գրանցվեցին, փաստ է: Հայը հայի վրա զենք բարձրացրեց, երեք ոստիկան զոհվեց, ազգը սիրող տղաներ վիրավորվեցին, տղաներ, որոնց մասին Հանրային հեռուստաընկերությունը ժամանակին ֆիլմ է նկարել ու հատ-հատ ներկայացրել այդ տղաների նվիրվածությունը սեփական հողին ու ազգին, որոնց հիմա ԱԺ փոխնախագահն ահաբեկիչ է անվանում՝ խախտելով իրավական նորմերը:

ԱԺ փոխնախագահը հորդորում է սիրել պետության սիմվոլին՝ ոստիկանին, այլապես ապագա չենք ունենա: Այլ պարագայում շարմազանովյան հորդորը երիցս տեղին կլիներ, բայց շարմազանովյան հարազատ կուսակցությունը մսխել է մեր պետության ապագան ու ներկան՝ այնպես, որ պետության յուրաքանչյուր սիմվոլի հանդեպ սերն ու ատելությունը խառնվել են:

Ապրիլյան պատերազմը, որ 100 զինվորի կյանք խլեց, ՀՀԿ-ական Հերմինե Նաղդալյանը հակառակորդի կողմից վերցրած տարածքները համարեց բուֆերային գոտի՝ արհամարհելով պետության ամենաարժեքավոր սիմվոլը՝ հայ զինվորի կյանքը:

Եվ այդ ժամանակ չգտնվեց գոնե մեկ Շարմազանով, որ ասեր՝ Հերմինե′, ահաբեկչություն ես անում:

Երբ տարիներ շարունակ և այսօր ՀՀԿ-ի կողմից սեփական ժողովրդին արտագաղթ է պարտադրվում, չգտնվեց մեկ Շարմազանով, որ ասեր՝ ՀՀԿ, ահաբեկչություն ես անում:

Երբ ոստիկանը տարբեր առիթներով ծեծում ու նվաստացնում էր սեփական քաղաքացուն, չգտնվեց մեկ Շարմազանով, որ ասեր՝ ոստիկա′ն, ահաբեկչություն ես անում:

Երբ սեփական ժողովրդին, մասնավորապես կես միլիոն կենսաթոշակառուի սովի են մատնել անբարոյական թոշակի պարագայում, չգտնվեց մեկ Շարմազանով, որ ասեր՝ իշխանությո′ւն, ահաբեկչություն ես անում:

Եվ ի վերջո, երբ Մարտի մեկ կազմակերպվեց ու 10 հայ մարդու կյանք խլվեց, չգտնվեց մեկ Շարմազանով, որ ասեր՝ ոստիկաննե′ր, հաստավիզ սափրագլուխնե′ր ու արյան գնով իշխանության եկածնե′ր, ահաբեկչություն եք անում: