Դավիթ Սանասարյանին անհապաղ ազատ արձակելու պահանջ-հայտարարություն է տարածվել

«Դավիթ Սանասարյան» քաղաքացիական նախաձեռնությունը տարածել է պահանջ-հայտարարություն, որում նշվում է.

Երևանում քաղաքական ընդդիմադիր ուժերից մեկի`«Հիմնադիր խորհրդարան»-ի և «Սասնա ծռեր» խմբի անդամները գրավեցին Երևան քաղաքում գտնվող հիմնական ոստիկանական բազաներից մեկը`վերջնագիր ներկայացնելով Հանրապետության նախագահին`ազատել իրենց առաջնորդին, ում անօրինականորեն բանտարկել էին մի քանի շաբաթ առաջ և Հայաստանի մյուս քաղբանտարկյալներին, նաև ներկայացնել սեփական հրաժարականը:

Հաջորդ օրը ստեղծվեց «Հակաճգնաժամային խորհուրդ», հանդիսանալով որպես միջնորդ երկու կողմերի միջև`որի հիմնական նպատակը խաղաղ ցույցեր կազմակերպելն էր՝ խուսափելով բախումներից և արյունահեղությունից: Ամենօրյա խաղաղ ցույցերն ընթանում էին ոստիկանների կողմից հարյուրավոր մարդկանց մասսայական ձերբակալություններով, ծեծերով ու խաղաղ մարդկանց առևանգելով:

Վերոհիշյալ խորհրդի անդամ էր նաև Դավիթ Սանասարյանը, ում հուլիսի 30-ի լուսադեմին առևանգեցին քաղաքացիական հագուստով 4 անձիք: Նրան առևանգել են «Սուրբ Գրիգոր Լուսավորիչ» բժշկական կենտրոնից՝ անգիտակից և ուշագնաց վիճակում գետնին քարշ տալով:

Երևանի ավագանու անդամ Դավիթ Սանասարյանը «Գրիգոր Լուսավորիչ» բժշկական կենտրոն է տարել հորը, ով արմունկի ոսկրի վնասվածք էր ստացել ոստիկանների բիրտ ու անմարդկային գործողությունների ընթացքում: Արդեն հիվանդանոցում քաղաքացիական հագուստով անձինք մոտեցել են Դավիթ Սանասարյանին, ներկայացել որպես ոստիկան՝ փորձելով Սանասարյանին բերման ենթարկել: Վերջինս ասել է, որ իր հայրը վնասվածքով հիվանդանոցում է, և ինքը հիմա չի կարող բաժին գնալ, խնդրել է վաղը ծանուցագիր ուղարկել, որից հետո ինքը պատրաստ կլինի ներկայանալ:

Քաղաքացիական հագուստով անձինք, սակայն սկսել են քարշ տալ Սանասարյանին, ում ինքնազգացողությունը կտրուկ վատացել է, և նա ուշագնաց է եղել, բայց նրան շարունակել են քաշել միջանցքով:
Սանասարյանի ծնողները և բժիշկները կարողացել են պահել նրան, սակայն որպես ոստիկան ներկայացած մարդիկ չեն հեռացել հիվանդանոցից, անգամ այն բանից հետո, երբ բժիշկները, տեսնելով Դավիթի ուշագնաց վիճակը, սկսել են միջամտել, որպեսզի նրան տեղափոխեն վերակենդանացման բաժանմունք:

Զարմանալիորեն, Դավիթին պատգարակով տանելիս`բժիշկների հետ միասին վերակենդանացման բաժին են գնում նաև այդ քաղաքացիական հագուստով մարդիկ: Որոշ ժամանակ անց պարզվում է, որ նրան ոչ թե տարել են վերակենդանացման բաժին, այլ ԱԱԾ (Ազգային անվտանգության ծառայություն)`կալանավորելու զանգվածային անկարգություններ հրահրելու մեղադրանքով, որը սուտ է և կեղծ, քանի որ խմբի անդամները միայն խաղաղ ցույցերի և բանակցությունների կոչեր էին հնչեցնում ամբողջ շաբաթվա ընթացքում:

Ըստ հոդվածի, Դավիթին առաջադրվում է պատիժ`ազատազրկում, տույժեր, տուգանքներ: Ներկայացված հոդվածը ծիծաղելի է և շինծու, որով փորձում են հասարակական ակտիվ գործչին լիովին մեկուսացնել հասարակությունից և չեզոքացնել նրա ակտիվ գործունեությունը:
Արդեն երկրորդ օրն է արգելում են Դավիթին սնունդ, հագուստ ու գիրք փոխանցել: Երեկ նա եղել է դատաբժշկականում, արձանագրվել են մարմնական վնասվածներ և քերծվածքներ, ինչը խոսում է այն մասին, որ Դավիթին ներսում ենթարկում են ֆիզիկական խոշտանգումների ու հալածանքների:

Դավիթն ունի ավելի քան 10-ամյա քաղաքական և հասարական ակտիվ գործունեության փորձառություն, և երբևէ բռնի գործողությունների կողմնակից չի եղել և նման կոչեր ու հայտարարություններ երբևէ չի հնչեցրել: 2013թ.-ից նա Երևանի ավագանու անդամ է, 2007.թ.–ից «Ժառանգություն» կուսակցության անդամ է, ներկայումս` որպես կուսակցության մամլո խոսնակ, 2008-2010թթ, եղել է կուսակցության երիստասարդ թևի նախագահ, հանդիսանում է կուսակցության ներկայացուցիչը Եվրոպական Ժողովրդական Կուսակցության Քաղաքական Ասամբլեայում, 2007-2012թթ. Ազգային ժողովում` որպես Քաղաքական և իրավական հարցերով խորհրդատու, ակտիվ քաղաքական և հասարակական գործիչ է՝ 30–ից ավելի մարդու իրավունքների, սոցիալական, հանրային և քաղաքացիական նախաձեռնությունների կազմակերպիչ, մի շարք հասարակական կազմակերպությունների հիմնադիր տնօրեն և ծրագրերի կոորդինատոր: «Դավիթ Սանասարյան» Քաղաքացիական նախաձեռնությունն այս ձերբակալությունը համարում է խիստ անօրինական և պահանջում է շուտափույթ ազատ արձակել Դավիթին:

«Դավիթ Սանասարյան» Քաղաքացիական նախաձեռնությունը տեղեկացնում է, որ այս պահին դիմում է տարբեր միջազգային և դիվանագիտական կազմակերպությունների, նաև միջազգային լրատվական միջոցների` Դավիթին ազատ արձակելու պահանջին միանալու և աջակցելու խնդրանքով:
Տեղեկացնում ենք, որ արդեն մի քանի միջազգային կազմակերպություններ հանդես են եկել այսպիսի պահանջով:

Մենք արդեն ունենք մոտ 2000 ստորագրություն, ինչը մեզ տալիս է անհրաժեշտ լեգիտիմությունը սկսելու բողոքի գործընթաց այս անօրինականության դեմ: Նախաձեռնությունը թակելու է բոլոր հնարավոր և անհնար դռները, որպեսզի ազատ արձակի Դավիթ Սանասարյանին:

Նախաձեռնության անդամները խնդրում են բոլոր նրանց, ովքեր համաձայն են Դավիթին ազատ արձակելու պահանջի հետ, ստորագրել այս պահանջ հայտարարությունը`տեղադրված Նախաձեռնության ֆեյսբուքյան խմբում`