Իշխանությունն ուրացել է «մեր ու մանուկ»

«Ամենածանր դեպքն, իհարկե, Գեղարքունիքի մարզի բնակիչ Սայաթ Հարությունյանի դեպքն է, ում աչքը հեռացրել են, տղան 16 տարեկան է: Հայրը պատմեց, որ որդին Երևան  է եկել ծննդյան կապակցությամբ հագուստ գնելու, օգոստոսի 8-ին լրանալու է 17-ամյակը, պայթյունից հետո ձախ աչքն սկսել է չտեսնել»,- հիվանդանոցում լրագրողներին ասել է պատգամավոր  Նիկոլ Փաշինյանը:

Այն, որ իշխանությունը բազմիցս ապացուցել է, որ սեփական ժողովրդի դիակի վրայով կանցնի, բայց ոչինչ չի զիջի, այլևս կասկածից վեր էր:

ՀՀԿ «ծանր հրետանի» Շուշան Պետրոսյանի՝ «ա′յ լակոտ, աչքերդ կհանեմ» ժամանակին արված արտահայտությունը տառացիորեն կիրառվեց Սարի թաղում:

Երբ ՀՀԿ-ական Շմայսն ասում էր՝ կբռնաբարեմ, Սերժ Սարգսյանի  ոստիկանական իշխանությունը դա կիրառեց Սարի թաղում ու Խորենացիում, և շարքային հայաստանցին տեսավ, թե ինչպես է բռնաբարվում իր ամենատարրական իրավունքը:

Երբ  Թոխմախի Մհերը լրագրողներին «նախիր» էր անվանում ու հայհոյում, Սերժ Սարգսյանի ոստիկանական իշխանությունը նույն Թոխմախի Մհերի տղերքի հետ «չոբանի» պես հարձակվեց լրագրողների վրա:

Երբ  գեներալ Մանվելը հասկացրեց, որ «չագուչն» էլ, ուրագն էլ իշխանության ձեռքին է, երեկ Սարի թաղում Սերժ Սարգսյանի ոստիկանական իշխանությունը մեխն ու «չագուչը» վերածեց ոստիկանական զենքի ու հարձակվեց ժողովրդի վրա՝ մտավ տներ ու ավերեց:

Ի դեպ, տղան, ում աչքը հանել են, մեկ տարի հետո պետք է գնար բանակ ու թուրքի դեմ կռիվ տալով պաշտպաներ արդեն չգիտես՝ ում:

Newspress.am