Արամ Մանուկյանը տեղափոխվել է կարանտինային բաժանմունք. ՄԻՊ  

ՀՀ մարդու իրավունքների պաշտպանի աշխատակազմի խոշտանգումների և վատ վերաբերմունքի կանխարգելման վարչության աշխատակիցներն այսօր՝ հուլիսի 29-ին, այցելել են «Դատապարտյալների հիվանդանոց» քրեակատարողական հիմնարկ՝ «Սասնա ծռերի» անդամ Արամ Մանուկյանին տեսակցելու: Այս մասին տեղեկանում ենք ՀՀ մարդու իրավունքների պաշտպանի աշխատակազմից:

Պաշտպանի աշխատակազմի ներկայացուցիչների այցի պահին Արամ Մանուկյանը տեղափոխվել է կարանտինային բաժանմունք և շարունակելու է պահվել այնտեղ, որտեղ, ըստ քրեակատարողական հիմնարկի բժշկական անձնակազմի, պահման պայմանները հիվանդախցերի պայմաններից զգալիորեն տարբերվում են: Մեր դիտարկմամբ, նոր բաժանմունքի պատերը և հատակը նորոգված են, խցերն առավել լուսավոր եւ մաքուր են, հագեցած են բժշկական մահճակալներով, բազկաթոռներով, սառնարանով:

Ավելի վաղ տեղեկացրել էինք, որ այսօր վիրավորվել է Ոստիկանության ՊՊԾ գունդը գրոհած «Սանա ծռեր» զինված խմբի անդամ Արայիկ Խանդոյանը` «Միայնակ գայլը»:

Հիշեցնենք, որ հուլիսի 17-ի առավոտյան «Սասնա ծռեր» զինված խումբը Էրեբունիում գրոհով վերցրել է ՊՊԾ գունդը և պատանդ են վերցրել ոստիկանության ծառայողների: Մեկ ոստիկան՝ նույն գնդի փոխհրամանատար Արթուր Վանոյանը զոհվել է: Վիրավորվել են ևս չորս ոստիկաններ և ՊՊԾ գնդի գրոհին մասնակցած անձանցից մեկը՝ Թաթուլ Թամրազյանը: Հուլիսի 23-ին «Սասնա ծռերն» ազատ են արձակել վերջին 4 պատանդներին, այդ թվում ՀՀ փոխոստիկանապետ Վարդան Եղիազարյանին և Երևանի փոխոստիկանապետ Վալերի Օսիպյանին:

Ըստ ոստիկանության, հուլիսի 26-ի առավոտյան ոստիկանության և զինված խմբի միջև փոխհրաձգության ընթացքում վիրավորվել է մեկ ոստիկան և «Սասնա ծռերից» Աշոտ Պետրոսյանն ու Հովհաննես Հարությունյանը, նրանք տեղափոխվել են հիվանդանոց:

Հուլիսի 27-ին, ոստիկանության փոխանցմամբ, հրաձգության ընթացքում վիրավորվել են «Սասնա ծռերից» Պավլիկ Մանուկյանը, նրա որդին՝ Արամ Մանուկյանը, ինչպես նաև իրավապահները ձերբակալել են զինված խմբից Արամ Հակոբյանին և Գագիկ Եղիազարյանին: