Ձեզանից բժիշկ դուրս չեկավ, Արկադի

Ազգային ժողովի՝ ներկայումս ՀՀԿ-ական պատգամավոր Արկադիի Համբարձումյանն ավելի շատ հանրությանը հիշեցնում է իր մասին ոչ թե որպես պատգամավոր, այլ «Սլավմեդ» բժշկական կենտրոնի սեփականատեր: Իհարկե, այստեղ հարցը գովազդի մասին չէ, այլ հաճախակի այս հիվանդանոցում արձանագրվող մայրական և նորածինների մահացության:

Վերջին դեպքն արձանագրվեց օրերս, երբ հայտնի դարձավ, որ «Սլավմեդ» ԲԿ-ում 28-ամյա հղիին կեսարյան հատում են արել, կնոջ վիճակը վատացել է, նրան տեղափոխել են Հանրապետական հիվանդանոց, որտեղ ժամեր անց մահացել է: «Սլավմեդից» խոստացել են ծննդկանի մահվան կապակցությամբ մանրամասներ ճշտել Հանրապետական հիվանդանոցից, սակայն նշենք, որ մահվան դեպքերի ժամանակ «Սլավմեդից» մասնագիտական օգնության համար հիվանդներին տեղափոխում են այլ հիվանդանոցներ՝ թե′ մայրերի, թե′ նորածինների պարագայում:

Եթե հիվանդանոցը չի կարողանում օգնել իր հիվանդին կամ պատասխանատու լինել մոր և երեխայի կյանքի համար, ինչո՞ւ պետք է նման բուժկենտրոն գործի: Հանրությունը տեղյակ է լինում միայն մահվան դեպքերին, սակայն քանի դեպք է ավարտվում հաշմանդամությամբ, կամ խեղումով:

Հիշեցնենք, որ Արկադի Համբարձումյանը մասնագիտությամբ իրավաբան է, բայց մինչ այդ բանվոր, ԼԿԵՄ կոմիտեի քարտուղար, քննիչ, իսկ երբ 1997թ. գործերը լավ են գնացել, հիմնադրել է «Դերժավա» և «Սլավգրուպ» ընկերությունները: Համբարձումյանին պատկանող «Սլավա գրուպ» ընկերությունը ոչ միայն մեքենաներ է ներկրում, այլև հանդիսանում է քաղցրավենիքի ամենահայտնի ֆիրմաների՝ «Մարսի», «Նեսթլեի» և այլոց պաշտոնական ներկայացուցիչը ՀՀ-ում: Համբարձումյանին պատկանող «Սլավա գրուպ» ընկերությունը մեքենաներ է ներկրում, նաև հանդիսանում է քաղցրավենիքի ամենահայտնի ֆիրմաների՝ «Մարսի», «Նեսթլեի» և մի շարք ընկերությունների պաշտոնական ներկայացուցիչը Հայաստանում:

Եթե Հայաստանում մարդիկ զբաղվեն իրենց գործով՝ երկիրը երկիր կդառնա. այս մասին խոսվում է, երբ հարթակում դիլենտանտ մտածողությամբ և գործելակերպով անձինք են: Այս դեպքում՝ եթե իրավաբան ես, ապա գործելու մեծ դաշտ կա՝ մարդու իրավունքներից` մինչև դատական անարդարություններ, սակայն չգիտես ինչու Համբարձումյանն ընտրել է կանանց: Սակայն լինելով ոչ պրոֆեսիոնալ՝ ամեն անգամ նրա հիվանդանոցում մայրերը ենթարկվում են կյանքի ու մահվան փորձության: Այստեղ երևի թե իր խոսքն ունի ասելու Առողջապահության նախարարությունը, քանի որ առողջապահությունն այնպիսի հիմնարկ է, որտեղ մարդու կյանքն է սեղանին: Եվ եթե ոչ մասնագետ որոշի բուժհիմնարկ բացել, ապա բացի գրպանները լցնելուց, նաև ավելի կարևոր գործ կա՝ մարդու կյանք փրկելը, որը ոչ թե ՕԵԿ-ից ՀՀԿ-ական դառնալու պես խաղ ու պար է:

Ինչպես ասում են՝ Ձեզանից բժիշկ դուրս չեկավ, Արկադի:

Newspress.am