Նախատեսվում է տարեկան Իրանից Վրաստան արտահանել մինչև 500 միլիոն խորանարդ մետր գազ

2015թ. դեկտեմբերին Երևանում կայացած քառակողմ բանակցություններից հետո հայտարարվեց, որ Հայաստանը, Իրանը, Վրաստանը և Ռուսաստանը պայմանավորվել են ստեղծել համակարգող խումբ՝ չորս երկրները կապող էներգետիկ միջանցք ստեղծելու համար:
Սակայն, ինչպես նշվեց, խոսքը միայն էլեկտրաէներգիայի մեծածավալ փոխանակման մասին է:

Հիշեցնենք, որ Իրան-Հայաստան գազատարը շահագործման է հանձնվել 2007թ. և հենց նույն տարում վաճառվել է ռուսական «Գազպրոմին»: Նախատեսված էր, որ գազամուղի տրամագիծը պետք է լինի 1200 միլիմետր, սակայն, կառուցվեց միայն 700 միլիմետրանոց գազատար, որը կարող է տարեկան առավելագույնն ապահովել մինչև 2 միլիարդ խորանարդ մետր գազ:

Ինչ վերաբերում է Հայաստանին, ապա մինչև 2018թ. ավարտն Իրանից դեպի Հայաստան գազի արտահանման ծավալները 1 միլիոն խորանարդ մետրից կհասցվեն 3 միլիոն խորանարդ մետրի:

Փոխվել է նաև կազմակերպությունը, որը Հայաստանում իրանական գազ է գնելու։ Նախկինում դա Երևանի ՋԷԿ-ն էր, իսկ հիմա կլինի այլ կազմակերպություն, իսկ թե որը, չի նշվում:

Փոխվել է Իրանի և Հայաստանի միջև գազ-էլեկտրաէներգիա բարտերի գործակիցը։ Նախկինում Իրանն ստանում էր 3կՎտ/ժ էլեկտրաէներգիա յուրաքանչյուր խ/մ գազի համար, իսկ հիմա կստանա 3.2։

Այժմ Հայաստանը և Վրաստանn արդեն համաձայնության են եկել Հայաստանի տարածքով 500 մլն խմ գազ Վրաստան արտահանելու վերաբերյալ, սակայն Հայաստանին՝ որպես հիմնական խաղացողի, տարածաշրջանային երկրները կարծես թե չեն ընկալում. Հայաստանի վրա դեռևս մեծ է ռուսական էներգակիրների ճնշումը:

Newspress.am