ՄԻՊ ներկայացուցիչներն այցելել են Արամ Մանուկյանին, Ալեք Ենիգոմշյանին, Լևոն Բարսեղյանին և մյուսներին

Մարդու իրավունքների պաշտպանի հանձնարարությամբ այսօր` հուլիսի 28-ին, Պաշտպանի ներկայացուցիչներն այցելել են «Դատապարտյալների հիվանդանոց» քրեակատարողական հիմնարկ՝ տեսակցելու Արամ Մանուկյանին (Պավլիկ Մանուկյանի որդուն-խմբ) եւ այնտեղ գտնվող՝ Ոստիկանության ՊՊԾ գնդի դեպքերի կապակցությամբ մյուս վիրավորված եւ կալանքի տակ գտնվող անձանց:

«Աշխատակազմի ներկայացուցիչներն այց են կատարել ԱԱԾ ձերբակալվածների պահման վայր՝ տեսակցելու Ալեք Ենիգոմշյանին, ինչպես նաեւ Ոստիկանության ՁՊՎ՝ տեսակցելու Լեւոն Բարսեղյանին»,- ասված է ՄԻՊ գրասենյակի տարածած հաղորդագրության մեջ:

Նշենք, որ Արամ Մանուկյանին մեղադրանք է առաջադրվել Քրեական օրենսգրքի 219-րդ հոդվածի 3-րդ մասով (Շենքեր, շինություններ, տրանսպորտի, հաղորդակցության կամ կապի միջոցներ զավթելը) եւ 235-րդ հոդվածով (ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը)։ Նա երկու ամսով կալանավորվել է:

Գյումրիի «Ասպարեզ» ակումբի ղեկավար Լեւոն Բարսեղյանը նախօրեին ձերբակալվել է: Նրա դեմ քրգործ է հարուցվել Քրօրի 235 4-րդ մասով (ապօրինի կերպով սառը զենք կրելը): Նրա մոտ դանակ են գտել:

Ալեք Ենիգոմշյանը նախօրեին ձերբակալվել է եւ կասկածվում է հուլիսի 17-ին ոստիկանության պարեկապահակային ծառայության (ՊՊԾ) գնդի տարածքը գրաված զինված խմբին օժանդակելու մեջ։ Նա ԱԱԾ Ձերբակալվածների պահման վայրում է: