Երբ կառավարությունը ղեկավարում է զենքով

Թեև կան բացթողումներ ու ստեղծվել են որոշ խնդիրներ, բայց Խորենացիի փողոցում տեղի ունեցող գործողությունները հայ ժողովրդի զարթոնքն են: Newspress.am-ի հետ զրույցում, անդրադառնալով «Սասնա ծռեր» ջոկատի գործողություններին ու հասարակության արձագանքին՝ իր տեսակետը հայտնեց «Ղարաբաղ» կոմիտեի նախկին անդամ Աշոտ Մանուչարյանը:

«Անկախ նրանից, թե ցույցերի մասնակիցների թիվը 1000 է, թե 2000, անկախ նրանից, թե այդ մասնակցների մեջ քանի գործակալ կա, անկախ նրանից, թե այս կամ այն քաղաքական կամ հասարակական գործիչն ազնիվ է, թե ճամարտակում է հասարակության առաջ` ինչ-ինչ դիվիդենտներ ստանալու համար, այս գործառույթի տերը հայ ժողովուրդն է… նա իր կամքն է իրականացնում, այսինքն` ուզում է երկիրը բերել բնականոն հունի»,- նշում է Մանուչարյանը` հավելելով, որ թե′ քաղաքագետները, թե′ պաշտոնյաներն այդ երևույթի հետ պետք է հաշվի նստեն:

Հարցին, թե հնարավո՞ր է արդյոք «Սասնա ծռեր» զինված ջոկատի գործողությունները դառնան նախադեպ, և ի հայտ գան նոր ջոկատներ, որոնք զենքի միջոցով փորձեն գրավել այլ կարևոր նշանակության տարածքներ ու իրենց պահանջները ներկայացնեն` Աշոտ Մանուչարյանը պատասխանեց, որ երկրում զենքով գործելու մշակույթը կառավարությունն է մտցրել:

Վերլուծաբանի խոսքով՝ երբ կառավարությունը զենքով է կառավարում` զենքով սաստելով և ճնշելով ժողովրդին ու խլելով ամբողջ ազգային հարստությունը, ապա իհարկե տարբեր մարդկանց գլխում կարող են նմանատիպ «տխուր» մտքեր անցնել, բայց դա ոչ մի կերպ չի կապվում «Սասնա ծռեր» ջոկատի զինված խմբի հետ:

«Այս խումբը չի դրել իր սեփական շահերից բխող պահանջներ` էդ մարդիկ իշխանավորների նման իրենց համար մերսեդեսներ չեն ուզում, կամ չեն ասում` մեզ տվեք օլիգարխների տները: Նրանք դրել են ժողովրդի և երկրի պահանջները` ձևակերպված մի քիչ անսովոր ձևով»,- ասաց Աշոտ Մանուչարյանը:

Դիտարկմանը, թե ստեղծված իրավիճակը որոշ քաղաքական ուժեր և գործիչներ օգտագործում են որպես հարթակ, սեփական PR-ի կամ «քվե»-ներ հավաքելու նպատակով, վերլուծաբանը նկատեց, որ, իհարկե, կան նաև այդպիսի մարդիկ, հատկապես որ երկրի քաղաքական մշակույթն այդպիսին է, և այսօր բոլորն էլ այդ սկզբունքով են առաջնորդվում:

«Մենք 30 տարի է՝ իրար ասում ենք, որ մարդը գալիս է աշխարհ, որպեսզի ցանկացած ճանապարհով մի բան պոկի, տանի` օգտագործելով այն իր շահի համար: Հիմա մենք ինչի՞ եք մտածում, որ այդ քաղաքական ուժերը տիեզերքից են իջել և նրանք այլ նպատակով պետք է առաջնորդվեն… նրանք էլ այդ սկզբունքով կառաջնորդվեն»,- ասաց Մանուչարյանը:

Նա հույս է հայտնեց, որ եթե որոշ մարդիկ սեփական շահից ելնելով են փորձում լիդեր դառնալ, ու այդ երևույթը նրանց մեջ մտել է որպես հիվանդություն, ապա չի բացառվում, որ նրանք արագ հրաժարվեն դրանից:

Ըստ Մանուչարյանի` կարևորը ոչ թե նման ձևով դրսևորվող մարդկանց մասին խոսելն է, այլ հակառակը` պետք է խոսել նրանցից, ովքեր անկեղծ են և նվիրյալ:

«Եթե նրանց մասին խոսենք` մյուսներն էլ այդպիսին կդառնան…»,- վստահեցրեց մեր զրուցակիցը: