Բանջարեղենի և կարտոֆիլի գները նվազել են

2016թ. հունիսին մայիսի համեմատ հանրապետությունում արձանագրվել է պարենային ապրանքների 1.2% գնանկում, ինչի վրա իր անմիջական ազդեցությունն է թողել բանջարեղենի և կարտոֆիլի, ձվի, մսամթերքի՝ 18.3-1.2% գնանկումը: Այս մասին տեղեկացնում են ազգային վիճակագրական ծառայությունից:

Դիտարկվող պարենային 13 ապրանքախմբերից 9-ում նշված ժամանակահատվածում գրանցվել է 18.3-0.2% գնանկում, 3-ում` 0.1-27.4% գնաճ, իսկ մեկում պահպանվել է գների նախորդ ամսվա մակարդակը:

Բանջարեղենի և կարտոֆիլի ապրանքախմբում՝ 2016թ. հունիսին 2015թ. հունիսի համեմատ արձանագրվել է 21.4% գնաճ, իսկ 2016թ. մայիսի համեմատ`18.3% գնանկում: 2016թ. հունիսին մայիսի համեմատ կանաչ պղպեղի գինը նվազել է 58.0%-ով, կանաչ լոբունը՝ 55.5%-ով, լոլիկինը`50.2%-ով, սխտորինը՝ 21.9%-ով, խառը կանաչեղենինը`16.4%-ով, կաղամբինը`13.5%-ով, սմբուկինը՝ 11.1%-ով, կանաչ սոխինը` 11.0%-ով, ծաղկակաղամբինը`8.1%-ով, սնկինը` 2.8%-ով, գլուխ սոխինը` 1.2%-ով: Միաժամանակ, հանրապետությունում գրանցվել է գազարի՝ 0.7%, կարտոֆիլի՝ 1.7%, ճակնդեղի՝ 35.7%, վարունգի 36.1% գնաճ:

Հանրապետության դիտարկված բոլոր քաղաքներում 2016թ. հունիսին մայիսի համեմատ բանջարեղենի և կարտոֆիլի ապրանքախմբի գները նվազել են 22.7-15.3%-ով, այդ թվում, գնանկման ամենաբարձր ցուցանիշն արձանագրվել է ք. Աշտարակում: Մայրաքաղաքում բանջարեղենի և կարտոֆիլի ապրանքախմբի գները նվազել են 18.5%-ով: