Վարչապետը զինվում է

Վարչապետն այսօրը երեկ հրամանագիր է ստորագրել մարզպետարանների և նախարարությունների աշխատակազմերի ղեկավարներին պարգևատրելու մասին: Ով ինչպես է աշխատում` հայտնի-անհայտ է, իսկ թե ինչպես է աշխատում Հովիկ Աբրահամյանը, ասենք, որ ողջ Հայաստանում ջրաղացները չեն աշխատում, սակայն վարչապետի ջրաղացը միշտ էլ աշխատել է:

Նշենք, որ, օրինակ, Գյուղատնտեսության նախարարության աշխատակազմի ղեկավար Արտաշես Կիրակոսյանն աշխատել է քննիչից սկսած, պարգևատրվածների մեջ են իրավաբաններ, բժիշկներ, տնտեսագետներ:

Հարց է առաջանում` ինչու է ՊՊԾ գնդի տարածքում ծավալվող իրադարձությունների այս օրերին վարչապետն այնքան պարապ, որ 24 հոգու պարգևատրել է:

Երևում է` վարչապետը հույսը դրել է միայն իր վրա, ոչ ոքի չի հավատում: Չէ՞ որ ում պարգևատրել է, նրանք հավերժ շնորհապարտ կլինեն Հովիկ Աբրահամյանին՝ օդից ընկած պարգևի համար: Խոսվում է պետական ապարատի ուռճացման, աշխատակիցներին բարեկամ-ծանոթ-ընկերների նշանակման մասին, և այսօր ուռճացած ապարատի ընկեր-բարեկամներին պարգևատրում են: Արժե շնորհակալ լինել:

Եվ եթե խոսվում է հրաժարականների մասին, ապա վաղը եթե հարցնեն պարգևատրվածներին, թե ցանկանում եք վարչապետը հրաժարական տա, միանշանակ կպատասխանեն՝ ոչ:

Խմբեր կան, որ զինվում են, խմբեր կան, որ կոչեր են հնչեցնում, խմբեր կան, որ դրամաշնորհներ են ստանում, մարդ էլ կա պարգևատրվածների գումարտակ է ստեղծել: Եվ եթե յուրաքանչյուր խմբին հետապնդում է որոշակի նպատակների լայն սպեկտոր, ապա գերատեսչությունների աշխատակազմերի ղեկավարների պարգևատրումը զուտ անձնական է. նրանք այլևս պատկանում են վարչապետի անձնական գումարտակին և պատրաստ են մարտնչելու հանուն Հովիկ Արգամիչի:

Արժե, որ գործող վարչապետից սովորեն ձիու քայլ անել, երբ բոլորի ուշադրությունն Էրեբունու զարգացումներն են, վարչապետը պարգևատրվածների բանակ է հավաքում:

Հիշեցնենք, որ Հովիկ Աբրահամյանը դատարկ տեղը ոչինչ չի անում, եթե շահ չունենա: Որպես ապացույց նշենք, որ վարչապետ դառնալուն պես` նա Մխչյանի մանկապարտեզի ճանապարհն ասֆալտապատելու համար կառավարության նիստով «Բերմա» ընկերությանը տրամադրեց 22 միլիոն 887 հազար դրամ: Ի դեպ, «Բերմա» ընկերության վերաբերյալ տվյալներ պետռեգիստրում չկային: Ասում են, որ Մխչյանի տարածաշրջանում «Հովիկ Աբրահամյան» սահմանադրությունն է գործում:

Կարող ենք հավելել նաև, որ Մխչյանի մանկապարտեզի ճանապարհի ասֆալտապատման համար Հովիկ Աբրահամյանը պարզապես կարող էր ցուցում տալ տնավարի, և այն կիրականացնեին, սակայն ոչ 22 մլն դրամ` մի քանի մետր ճանապարհի համար: Ինչո՞ւ հիշեցինք այս հին պատմությունը, պարզապես նրա համար, որ որևէ գործ Հովիկ Աբրահամյանը չի ձեռնարկում, եթե դրանից օգուտ չունենա:

Այս օրերին, երբ խոսում են Սերժ Սարգսյանի հրաժարականի մասին, Հովիկ Աբրահամյանը վարչապետական թիմ է հավաքում:

Newspress.am