Որոշ քաղաքական գործիչներ վախեցած են ավելին, քան հարսները խորանի առջև

Այս օրերին, երբ «Սասնա ծռերը» պահանջում են ՀՀ նախագահ Սերժ Սարգսյանի հրաժարականը, շրջանառվում է կառավարության, ուժային կառույցների որոշ պաշտոնյաների պաշտոնաթողության մասին:

Գուցե այդպես է, քանի որ Խորենացու փողոցի իրադարձությունների հենց առաջին օրվանից, մինչ այդ լրատվամիջոցներում մշտապես ներկա քաղաքական գործիչները միանգամից՝ կախարդական փայտիկի օգնությամբ անհետացան: Անգամ խոսում էին, որ փախչել են երկրից. Ոմանք անգամ ցույց էին տալիս, որ բազմազբաղ են 40 աստիճանի պայմաններում:

Հավելենք միայն, որ երբ իր խոսքն ասաց Սերժ Սարգսյանը, ապա Դաշնակցությունն անմիջապես հայտարարություն տարածեց. ընդդիմադիր Դաշնակցությունն սպասում էր իշխանության խոսքին:

Չի բացառվում, որ փոփոխություններ լինեն, և նախագահն ազատվի ոչ ցանկալի քաղաքական գործիչներից, որոնք փաթաթվել են իշխանությանը՝ ելնելով քաղաքական տարբեր պատճառներից. մեկը ներս է խցկվել, մյուսն ազգական է, երրորդը փող ունի, չորրորդը լավ կարողանում է խաբել: Կարճ ասած` հնարավոր է մի մեծ ավելով մաքրեն քաղաքական դաշտը՝ ոչ թե մաքուր քաղաքական դաշտ ունենալու, այլ պարզապես իմիտացիայի համար:

Խոսվում է և′ վարչապետի, և′ գլխավոր ոստիկանապետի հրաժարականների մասին: Ի վերջո, անկախ իրավիճակից, կան օղակներ, որոնք պատասխանատու են երկրի անվտանգության համար: Պարզապես բեռնատար մեքենայով մտնել մի տարածք, որտեղ զենք ու զինամթերք կա և պետք էր, որ պաշտպանված լիներ և չէր` ինչպես հարկն է, ոմանք պետք է պատասխանեն: Սա լավ առիթ է նաև կոսմետիկ փոփոխությունների համար:

Եվ որպեսզի որևէ քաղաքական գործիչ կամ կուսակցություն չհայտնվի խաղից դուրս վիճակում, ապա բոլորի մոտ սպասողական վիճակ է, իսկ ովքեր ի պաշտոնե կամ ստիպողաբար են խոսել, ապա ավելի քան ակնհայտ էր՝ ավելի հմտորեն էին բառերն ընտրում, քան բանաստեղծները, ավելի զգուշավոր էին արտահայտվում, քան դիվանագետները և այդ ամենը մատնում էր, որ վախեցած են ավելին, քան հարսները խորանի առջև:

Այս օրերին առաջին պլան է մղվել քծնանքը, շողոքորթությունը, օճառվելը. ով կարող է ավելին՝ կմնա քաղաքականության մեջ, ով ոչ՝ ընդդիմադիրությունը կա ու կա:

Newspress.am