Հայաստանում մենք թշնամիներ չունենք. Շարմազանովը՝ ՊՊԾ գնդի գրավման մասին

Այսօր առաջնային խնդիրը բանակցությունների միջոցով ստեղծված իրավիճակի խաղաղ հանգուցալուծումն է: Այդ մասին այսօր ՀՀԿ ԳՄ նիստից հետո լրագրողների հետ զրույցում ասաց ՀՀ ԱԺ փոխխոսնակ Էդուարդ Շարմազանովը՝ մեկնաբանելով զինված խմբի կողմից ՀՀ ոստիկանության ՊՊԾ գնդի տարածքը գրավելու փաստը:

«Ուժային կառույցները երեկ, այսօր, դրանից առաջ ունեցել են միայն մեկ նպատակ՝ առանց արյունահեղության, բանակցությունների ճանապարհով հասնել այս դժվարին իրավիճակի հանգուցալուծմանը»,- ասաց Շարմազանովը:

Խոսելով այն մասին, թե ինչու էին այս օրերի ընթացքում իշխանությունները լռում, ԱԺ փոխխոսնակը նշեց, որ դա պայմանավորված է եղել այն հանգամանքով, որ չխոչընդոտեն բանակցային գործընթացը:

«Մեզ նոր արյուն պետք չէ, Հայաստանում մենք թշնամիներ չունենք: Այսօր թիվ մեկ խնդիրն է՝ անել ամեն ինչ, որպեսզի այս խնդիրը խաղաղ հանգուցալուծվի: Սա է Հայաստանի Հանրապետական կուսակցության պաշտոնական դիրքորոշումը: Մենք՝ որպես իշխանություն, անելու ենք բոլոր հնարավոր քայլերը, որպեսզի մեր մայրաքաղաքում, մեր հայրենիքում հայի արյուն չթափվի: Բավական է, որքան հայի արյուն է թափվել: Ոչ ոք ապահովագրված չէ սխալներից, սակայն լավագույն ճանապարհը երկխոսությունն է, միմյանց լսելը»,- ասաց նա՝ ցավակցություն հայտնելով նաև զոհված գնդապետ Արթուր Վանոյանի ընտանիքին: