Հուսով եմ` իշխանությունը վերլուծել է պահի լրջությունը և չի դիմի քայլերի, որոնց հետևանքները կլինեն անդառնալի երկրի համար. պատգամավոր

Դատապարտում եմ, երեկ երեկոյան, ոստիկանության կողմից ցուցարարների նկատմամբ հատուկ միջոցներ և ֆիզիկական ուժ կիրառելը՝ համոզված լինելով, որ այն կարող է միայն սրել իրավիճակը: Այս մասին ասված է ԱԺ ԲՀԿ խմբակցության պատգամավոր Հայկ Խաչատրյանի տարածած հայտարարության մեջ:

««Սասնա ծռեր» խմբի անդամներին չեմ համարում ահաբեկիչներ, նրանք հայրենիքը սիրող քաղաքացիներ են. պարզապես այս մեթոդն են ընտրել, հայրենիքում արդարության կարգեր հաստատելու համար: Ահաբեկիչներին ժողովուրդը երբեք չի սատարում, չի մտածում նրանց անվտանգության, առողջության ու անգամ սննդի մասին, մինչդեռ մենք այսօր ունենք հակառակ պատկերը՝ «Սասնա ծռեր» խմբի տղերքին աջակցելու համար փողոց են դուրս եկել բազմահազար քաղաքացիներ: Բախումներ թույլ չտալու համար ես նույնպես ամեն օր կլինեի նրանց շարքերում, եթե ինչ-ինչ հանգամանքների բերումով չգտնվեի ԱՄՆ-ում: Ստեղծված իավիճակը պայթյունավտանգ է, իսկ արյունահեղությունը կանխելու և փակուղուց դուրս գալու համար անհրաժեշտ է ռեալ երկխոսություն: Հուսով եմ, որ իշխանությունը վերլուծել է պահի լրջությունը և երբեք չի դիմի այնպիսի քայլերի, որոնց հետևանքները կլինեն անդառնալի երկրի ու ժողովրդի համար»: