Դաշնակցության կանացի դեմքը

Այսօր բազմամյա լռությունից հետո խոսել է դաշնակցական-հրապարակախոս Ալվարդ Պետրոսյանը:

Նախկին պատգամավորը բազմամյա լռությունը կոտրել է և բարբառել. «Ոչ մի բան չարժե, որ երկրիդ կայունությունը հարցականի տակ դնես»:

Կարող ենք նշել, որ երկրի անվտանգությունը և կայունությունը հարցականի տակ էր, երբ երկրում 70 տոկոսն աղքատ է, և արտագաղթն է երկրի լոգոն, երբ կոռուպցիայի մեջ թաղված իշխանական վերնախավն իր գործելաոճով հարվածում է անվտանգությանը, երբ երկրում կրթությունը, առողջապահությունը, իրավական համակարգը ճահճացել և ոչ թե անուղղակի, այլ ուղղղակի հարված է ազգային անվտանգությանը:

Այս տարիներին շատերը դժգոհ լինելով սոցիալական անարդարություններից, ողորմելի կենսակերպից՝ միշտ հիշում էին երկրի կայունության մասին, սակայն ապրիլյան պատերազմը ցույց տվեց, թե ովքեր էին մտածել և մտածում կայունություն պահպանելու համար և ուր գնացին կայունությանը միտված գումարները:

Հայաստանը կայունություն պահպանեց, որ երկիրը հարստահարողների բիզնեսները ծաղկեն, հանգիստ թալանեն երկրի բյուջեն, բանակի հաշվին վիլլաներ գնեն, արտերկրում բիզնեսներ ու առանձնատներ ձեռք բերեն, ի վերջո փողեր լվանան. այդ ամենի համար հայ ժողովուրդը սրտացավորեն կայունություն պահպանեց, է հետո՞:

Այս ամենից իր քաղցրեղենի բաժնեմասն ունի Դաշնակցությունը, քանի որ տարիներ շարունակ ունեցել են աշխատանքի և սոցիալական, կրթության, նաև էկոնոմիկայի նախարարների պորտֆելները: Ժամանակ առ ժամանակ մամուլում շրջանառվում է Դաշնակցության անդամների բիզնեսների մասին տեղեկությունները:

Այնպես որ, այս զգայուն օրերին հառնել մոխիրներից, որևէ մեկին հետաքրքիր չէ՝ հատկապես հիշեցնելով, որ Ալվարդ Պետորսյանը հին-հին ժամանակներում ընդդիմադիր է եղել: Կարող ենք հիշեցնել, որ Դաշնակցությունը միշտ էլ մի ոտքով իշխանական է եղել, մյուս ոտքով էլ իշխանության ձգտել, այնպես որ՝ Չե Գեվարայի կերպարը Դաշնակցության համար չէ:

Ընդդիմադիր-դաշնակցական Ալվարդ Պետրոսյանը Հայաստանի մասին ասում է. «Այսքան փխրուն, անկայուն, անհաջող հարևաններով շրջապատված երկիրը հարվածի տակ դնել չէր կարելի»:

Իհարկե լավ է, որ Ալվարդ Պետրոսյան կսիրե Հայաստան, սակայն նման մտածելակերպով ընդդիմադի՞ր:

Պարզվում է նաև, որ հայ ժողովուրդը դուրս է եկել Ալվարդ Պետրոսյանի գրպանից, և նա է միայն տեղյակ, որ ՊՊԾ գունդ ներխուժած հայերն «այս երկրի, այս ժողովրդի համբերության վրա են խաղում»:

Երկիրն ունի ղեկավարություն և իշխանություններ, և այս օրերի հետ կապված, եթե որևէ պաշտոնական արձագանք չկա, երկրի կայունության պահպանման համար վերին օղակների կոչեր, ուղերձներ չեն հնչում, նշանակում է՝ երկրի անհանգստության ռահվիրան հենց Ալվարդ Պետրոսյա՞նն է:

Newspress.am