Ողջ Պավել Մանուկյանն ավելի քիչ է վտանգավոր, քան՝ զոհված. Տիգրան Պասկևիչյան

Տիգրան Պասկևիչյանը ֆեյսբուքյան իր էջում գրել է.

«Մեր ամենամեծ խնդիրն այն է, որ իշխանությունները պարտվել չգիտեն։ Պարտությունն ընկալում են որպես մահ։ Պարտությունն, իրականում, հաղթանակի հականիշը չի։ Եվ առհասարակ հականիշներ ու հոմանիշներ չկան. դրանք հորինվել են երեխաներին (դպրոցական) կյանքի ուղուց շեղելու համար։ Պարտությունը պարտություն է, հաղթանակը՝ հաղթանակ։ Երբ պարտությունը հականիշ է, հաղթանակն է դառնում մահ։ Եվ հականիշության թաղարներում բուսնում են անլուսապսակ սրբապատկերներ, որոնք արյան ծարավն են հագեցնում։

Միայն։ Ուրիշ ոչինչ։

Պետք է հրաժարվել դպրոցում ստացած գիտելիքից ու սովորել պարտվել, գոնե՝ մասամբ, ոչ լիովին։ Դա կլինի առաջին փորձը, որը կփրկի հասարակությանը սրբապատկերներից, միաժամանակ թույլ տալով փոքր ինչ թոթափել նվաստությունը, որն հաղթանակից բացի ուրիշ դեղ ու ճար չունի։

Պարտվեք մի անգամ և կտեսնեք, թե ի՜նչ գեղեցիկ է կյանքը։

Հ.Գ. Ժիրայր Սեֆիլյանն ազատության մեջ ձեզ համար ավելի քիչ է վտանգավոր, քան բանտում։ Ողջ Պավել Մանուկյանն ավելի քիչ է վտանգավոր, քան՝ զոհված։ Գոնե այդքանը հաշվել կարողացեք, եթե ձեր տղայությունը մի քիչ ավելի բովանդակալի է, քան ոստիկանապետի սաստիկ հայացքը»։