Ինչպես կույս մնալ ի պաշտոնե

Արդեն երրորդն օրն է` Հանրապետությունում իրավիճակը լարված է, այս ընթացքում երկրի առաջին դեմքերն այդպես էլ որևէ խոսքով կամ ուղերձով հանդես չեկան:

Ավելին՝ խորհրդարանականներին և հանրությանն իր խոսքով զվարճացնող ԱԺ նախագահ Գալուստ Սահակյանը, ով սիրում է ամեն ինչի վերաբերյալ իր ուրույն կարծիքը հայտնել, կարծես թե պապանձվել է: Ո՞վ գիտե, գուցե մի քանի խոսք ասելով՝ իրավիճակը մեղմանար, ասում են՝ հումորը մարդկանց բարի է դարձնում, բայց այս օրերին Գալուստ Սահակյանն անգամ բարի չի ուզում դառնալ, ժլատացել է:

Ինչ վերաբերում է Հովիկ Աբրահամյանին, ապա նա ոչ թե չի ուզում խոսքով հանդես գալ, կամ որպես կառավարության գլուխ ասել իր ծանրութեթև խոսքը, այլ ամբողջ դարդերը թաղել է աշխատանքի մեջ, վեր է կացել ու գնացել Վայոց ձորի մարզ: Չէ՞ որ նա երկրիս վարչապետն է, և մարզային այցելությունները՝ նրա սուրբ պարտականություններից:

Իհարկե, նա չի գնացել Արմավիրի կամ Լոռու ու Արագածոտնի մարզեր, որտեղ վերջին կարկուտները հիմնահատակ ավերել են գյուղացիների հողատարածքները, այլ անմեղ Վայք:

Վարչապետը Եղեգնաձորում ուսումնասիրել է այծի պանրի նրբությունները, հետո կառավարության հաղորդագրությունն ամենայն մանրամասնորեն ներկայացնում է, թե որքան, որտեղ է արտահանվում պանիրը, երբ է կառուցվել գործարանը, ինչպես, ում միջոցներով, ինչպես է աշխատում, կաթի մթերումն ինչպես է իրականացվում, վերջապես՝ ով ում և ինչպես շնորհակալ եղավ և շնորհակալություն հայտնեց և այլն: Վարչապետը նաև այցելել է բուժմիավորում, գինու գործարան, քաղաքային պուրակ, «Արևիկ» մարզադաշտ:

Կարճ ասած՝ այծի պանրի, գինեգործության, բուժմիավորման, պուրակի, մարզադաշտի այս երկար ու ձիգ պատմությունը միայն նրա համար է, որ հանրությունը հասկանա՝ վարչապետը խիստ զբաղված էր Վայոց ձորի մարզում, հո չի գնացել իր քեֆով, գնացել է աշխատելու:

Անգամ տեսադաշտում չէ ՀՀ ոստիկանապետ Վլադիմիր Գասպարյանը, ով չի խուսափում հանրային վայրերում, իրադարձությունների տարածքում լինելուց, սակայն այս անգամ, որքան էլ զարմանալի է, գլխավոր ոստիկանապետն անցել է ընդհատակ:

Կարճ ասած՝ գերզբաղված վարչապետ, Ազգային ժողովի պապանձված նախագահ, մնաց երկրի նախագահը: Սերժ Սարգսյանը հրամանագրեր է ստորագրել:

Newspress.am