Չենք թույլատրելու որևէ ուժային լուծում ստեղծված իրավիճակում. նախաձեռնություն

«Մենք ենք տերը մեր երկրի» նախաձեռնությունը ֆեյսբուքյան իր էջում հանդես է եկել հայտարարությամբ, որով կոչ է անում ամեն օր հավաքվել Էրեբունու ոստիկանությանը հարակից հատվածում:

«Հուլիսի 19-ից սկսած՝ ամեն օր ժամը 18.30-ին հավաքվում ենք Էրեբունու ոստիկանությանը հարակից հատվածում: Բնականաբար, մասնակիցների մի մասը ցանկանում է այնտեղ մնալ շուրջօրյա, որ միշտ հսկողության տակ պահի իրավիճակը և թույլ չտա ոստիկանության բռնի գործողություններ կիրառի «Սասնա Ծռեր խմբի տղաների նկատմամբ: Ամեն մարդ ինքը կորոշի մնալ շուրջօրյա թե ոչ:

Անկախ նրանից, թե առանձին իվենթ կբացվի թե ոչ, մենք այս գրաֆիկը չենք փոխելու, այսինքն՝ ամեն օր ժամը 18:30-ից սկսելու ենք հավաքվել Էրեբունու ոստիկանությանը հարող հատվածում կամ մնալու ենք այնտեղ՝ ի զորակցություն Սասնա Ծռեր խմբի տղաների: Մենք ամեն ինչ անելու ենք, որ բացառվի որևէ ուժային լուծում ստեղծված իրավիճակում: Մեր նպատակն է աչալուրջ մնալ մոտակա մի շաբաթվա ընթացքում մինչև հարցի անուժային հանգուցալուծումը:

Կհավաքվենք այն փողոցների խաչմերուկում, որտեղից այն կողմ արդեն ոստիկանությունը փակել է ճանապարհը բեռնատարներով՝ Խորենացի փողոցի վրա:

Մենք համարում ենք, որ Սասնա Ծռեր խումբը պաշտպանում է բացառապես Հայաստանի ու նրա քաղաքացիների շահերը, այդ քայլին է գնացել բացառապես այդ շահերից ելնելով և նպատակ ունի ապահովել Հայաստանի ու Արցախի տարածքային անձեռնմխելիությունը ու ամբողջականությունը: Այդ խումբը հայտարարել է, որ չի ձգտում գալ իշխանության:

Եթե այդ խմբի որևէ անդամի նկատմամբ ուժ կիրառվի ոստիկանության կողմից, մենք դա համարելու ենք ոտնձգություն հայ ժողովրդի, Հայաստանի ու Արցախի տարածքային ամբողջականության դեմ:

Հիշեցնենք, որ այդ խմբում են Արցախի ազատամարտի լեգենդար հերոսներ Պավել Մանուկյանը (Ապարանցի Պավլիկ) և Արային Խանդոյանը (Միայնակ Գայլ) և այլ ազգանվեր հայորդիներ»,- ասված է նախաձեռնության հայտարարության մեջ: