Սովետը ծնավ ՀՀՇ, ՀՀՇ-ն ծնավ ՀՀԿ

Ինչու կառավարության մոտ որևէ կերպ չի ստացվում տնտեսելը, որովհետև սովոր չեն: Կառավարության ստորին օղակից վերին օղակները հագուկապից սկսած մինչև սնունդը և աշխատաոճը, տրանսպորտային միջոցները՝ բոլորովին չի հիշեցնում տնտեսում ասվածը:

Կառավարությունը երևի ենթադրում է, որ պետք է տնտեսել, սակայն այդ կարգն իրենց չի վերաբերում, անգամ կառավարության լույսի, գազի և խմելու ջրի ծախսերը պետք է համապատասխանի կառավարության դիրքին:

Այս տարի հոսանքի համար վճարվելու է 131 մլն դրամ կամ 273.000 դոլար, գազի համար՝ 70 մլն դրամ կամ 146.000 դոլար:

90-ականներին, երբ արդեն անկախ իշխանություններն սկսեցին ճոխ-ճոխ ծախսեր անել, գնել թանկարժեք մեքենաներ, ճոխ վերանորոգել աշխատասենյակները, գույք ձեռք բերել, ի պատասխան քննադատություններին՝ պատասխանում էին՝ հո էշով չենք գնալու աշխատանքի:

Խորհրդային շրջանի մտայնությունը տեղափոխվեց անկախության շրջան. սկսեցին գողանալ, թալանել, հարստանալ: Կիրթ, թե անկիրթ, եթե կարողացավ՝ հասավ քաղաքականություն, ապա օգտագործվեց յուրաքանչյուր լծակ հարստանալու համար, և զարմանալի չէ, որ համեստ հաշվարկներով երկրից անկախության շրջանում դուրս է եկել 10 մլրդ դոլար գումար՝ անօրինական ճանապարհով, իսկ օրինակա՞ն:

Հայրենի շատ օլիգարխներ, մեծահարուստ պաշտոնյաներ արտերկրում են բիզնես դնում՝ հեռու հայկական հարկային, մաքսային, հատկապես խնամիական խարդավանքներից՝ գլուխները հանգիստ, ականջները դինջ:

Եթե կառավարությունը նման ծախսեր է անում միայն տարրական կարիքների համար, ապա նույն խնդիրն է արտերկիր մեկնումների, հյուրերի նվերների առումով:

Կարճ ասած՝ կառավարության՝ տնտեսելու հայտարարությունը վերաբերում է ժողովրդին, միայն թե այս հայտարարությունը հիշեցնում է 90-ականների տնտեսումների հայտարարությանը, երբ ՀՀՇ-ն հայտարարում էր՝ ժողովուրդ, մի′ ապրեք ցոփ ու շվայտ կյանքով, իսկ ցոփ ու շվայտ կյանքով ապրում էր ՀՀՇ-ն՝ երկրի հաշվին: Այժմ էլ ՀՀԿ-ն է նույնը հայտարարում՝ աղքատ երկիր ենք, սակայն աղքատ երկրի տերերը բոլորովին էլ աղքատ չեն. անգամ զարմացնում են ամեն ինչ տեսած արտասահմանցիներին:

Մի խոսքով՝ Սովետից միայն թղթաբանությունն է փոխվել, իսկ կառավարության լեզվաճկունությունը հարյուրամյա պատմություն ունի, ժամանակին մեր կառավարությունից ավելի լավ էին խաբում, ներկայացնում ու հավատացնում. պարզապես Սովետի ծույլիկ աշակերտները Սովետի դասը վատ են սովորել: