Հունան Պողոսյանը հաստատեց՝ Վալերի Օսիպյանը պատանդ վերցվածների թվում է

Ատրճանակներով և ինքնաձիգներով զինված անձինք հարձակում են գործել ՀՀ ոստիկանության ՊՊԾ գնդի վրա, մուտք են գործել տարածք և այնտեղ բռնությամբ պահում են պատանդների, որոնք ոստիկանության ծառայողներ են: Այդ մասին այսօր լրագրողների հետ զրույցում ասաց ՀՀ ոստիկանապետի առաջին տեղակալ, ոստիկանության գեներալ-լեյտենանտ Հունան Պողոսյանը:

Վերջինս տեղեկացրեց, որ հարձակման ընթացքում սպանվել է ոստիկանության գնդապետ Արթուր Վանոյանը, հրազենային վնասվածքներ են ստացել ոստիկանության գնդապետ Արամ Հովհաննիսյանը,  ոստիկանության փոխգնդապետ Հրաչ Խոստեղյանը և ոստիկանության ենթասպա Գագիկ Մկրտչյանը: Եվս մի քանի հոգի այլ մարմնական վնասվածքներ են ստացել:

Հունան Պողոսյանի խոսքով՝ ներկայումս բանակցություններ են ընթանում:

«Ոստիկանությունը և բոլոր իրավապահ մարմիններն առաջին իսկ վայրկյաններից հորդորել և հիմա էլ հորդորում են հետ կանգնել հանցավոր մտադրություններից և հանձնվել իշխանություններին: Ոստիկանությունը և իրավապահ ողջ համակարգը ունեն ուժեր և միջոցներ և ձեռնարկում ու ձեռնարկելու են անհրաժեշտ կանխարգելիչ, օպերատիվ հետախուզական միջոցառումները: Եթե մեր հորդորները չլսվեն, մենք ի վիճակի ենք վնասազերծելու նրանց, որովհետև մարդասպանների հետ այլ կերպ չեն վարվում»,- նշեց փոխոստիկանապետը:

Լրագրողների այն հարցին, թե հստակ ժամկետ սահմանվա՞ծ է բանակցությունների ավարտի վերաբերյալ, Պողոսյանը պատասխանեց. «Քանի դեռ չենք կորցրել հույսը՝ բանակցություններով ավարտելու այս ողջ գործընթացը, մենք շարունակելու ենք բանակցել»:

Զինված խմբի պահանջների մասին Հունան Պողոսյանն ասաց, որ ընդամենը մեկ պահանջ է ներկայացվել՝ ազատ արձակել Ժիրայր Սէֆիլյանին:

Ինչ վերաբերում է պատանդներին՝ ՀՀ փոխոստիկանապետը նշեց, որ նրանք թվով յոթն են, որոնց թվում է Երևանի փոխոստիկանապետ Վալերի Օսիպյանը: