«ՀԺ». Ռուսները նյարդայնացել են, որ ՀՀ վարչապետը գազի հարցով զանգահարել է Իրանի փոխնախագահին

«Հայկական ժամանակ» թերթը գրում է.

«ՀՀ էներգետիկայի և բնական պաշարների նախարարությանը մոտ կանգնած մեր աղբյուրները պնդում են, որ «Գազպրոմի» ղեկավարությանը նյարդայնացրել է ՀՀ վարչապետի հեռախոսազրույցն Իրանի առաջին փոխնախագահ Էսհաղ Ջահանգիրիի հետ։

Խնդիրն այն է, որ այդ հեռախոսազրույցի ժամանակ Հովիկ Աբրահամյանն առաջարկել է իրանական կողմին Հայաստանին գազ մատակարարել առաջիկա մեկ ամսվա ընթացքում, քանի որ ՌԴ-ից Հայաստան եկող գազամուղի վրա վերանորոգման աշխատանքներ են իրականացվում։ Այդպիսի աշխատանքներ հաճախակի են արվում և այդ ընթացքում Հայաստանն օգտագործում է գազապահեստարաններում կուտակված գազը։ Կուտակված գազի ծավալը մանավանդ ամռանը Հայաստանի պահանջարկը կարող է բավարարել ավելի քան երկու ամիս, և Իրանից գազի մատակարարման կարիք չկա։

Ռուսական կողմը լուրջ մտահոգություններ ունի, որ ՀՀ իշխանությունները փորձում են ռուսական գազի այլընտրանք գտնել և ստեղծված առիթն օգտագործում են Հայաստանում իրանական գազի «ոտքը պնդացնելու» համար։

Ընդգծենք, որ Ռուսաստանի համար սկզբունքային հարց է և տարիներ շարունակ ՌԴ-ն ջանքեր է թափել Հայաստանը իրանական գազից հնարավորինս հեռու պահելու և ՀՀ-ի կախվածությանը ռուսական գազից խորացնելու համար։ Իրանից ներքին սպառման համար գազ մատակարարելու՝ ՀՀ վարչապետի առաջարկը կարող է էապես թուլացնել Հայաստանի կախվածությունը ռուսական գազից»:

Մանրամասները՝ թերթի այսօրվա համարում