Շիրակի մարզի Առափի գյուղի բնակիչների բաց նամակը՝ Սերժ Սարգսյանին, Գևորգ Կոստանյանին, Աղվան Հովսեփյանին, Վլադիմիր Գասպարյանին

Շիրակի մարզի Առափի գյուղի բնակիչների բաց նամակը՝ ՀՀ նախագահին, Գևորգ Կոստանյանին, Աղվան Հովսեփյանին, Վլադիմիր Գասպարյանին:

«Հայաստանի Հանրապետության նախագահ,
պարոն Սերժ Սարգսյանին

Հայաստանի Հանրապետության գլխավոր դատախազ,
պարոն Գևորգ Կոստանյանին

Հայաստանի Հանրապետության քննչական կոմիտեի նախագահ,
պարոն Աղվան Հովսեփյանին

Հայաստանի Հանրապետության ոստիկանության պետ,
պարոն Վլադիմիր Գասպարյանին

Հարգելի պարոն Նախագահ, պարոն Գլխավոր դատախազ, ՔԿ ղեկավար, ոստիկանապետ`

Մեր համայնքի բնակչությունն իր խորը վրդովմունքն է արտահայտում ՀՀ ոստիկանության Մուշի բաժնի, Շիրակի մարզի քննչական վարչության և Շիրակի մարզի դատախազության ապօրինությունների կապակցությամբ, որի հետևանքով մեր համագյուղացի մի խումբ երիտասարդներ հայտնվել են կալանավայրում:

Մասնավորապես, Արթուր Գևորգի Խաչատրյանին, Սեյրան Հմայակի Մարտիրոսյանին, Կարեն Համլետի Մարտիրոսյանին, Էդիկ Ցոլակի Սարգսյանին, Հովհաննես Սեդրակի Մխիթարյանին և երկու աղջիկների մեղադրանք է առաջադրվել այն բանի համար, որ իբր թե նրանք, գործով չպարզված ևս 5 անձանց հետ, մեկ միասնական դիտավորությամբ, իրենց գործողություններով միմյանց լրացնելով իշխանության ներկայացուցիչների՝ ՀՀ ոստիկանության Շիրակի մարզային վարչության Գյումրի քաղաքի Մուշի բաժնի ՔՀԲ պետ Խաչատուր Աշոտի Պետրոսյանի, նույն բաժնի ՔՀԲ պետի տեղակալ Հակոբ Գեղամի Աղաբեկյանի և նույն բաժնի ՀՈԲ տեսուչ Տիգրան Ռաֆիկի Դանիելյանի նկատմամբ գործադրել են առողջության համար վտանգավոր բռնություն, կապված նրանց կողմից իրենց ծառայողական պարտականությունները կատարելու հետ:

Բոլորը, այդ թվում նույն իրավապահ մարմինների աշխատակիցները գիտեն, որ դեպքի հանգամանքներն ուղղակի խեղաթյուրվել են ՀՀ ոստիկանության Մուշի բաժնի, Շիրակի մարզի քննչական վարչության և Շիրակի մարզի դատախազության աշխատակիցների կողմից, որպեսզի կոծկեն ՀՀ ոստիկանության Մուշի բաժնի հիշյալ աշխատակիցների կողմից կատարված հանցագործությունները:

Իսկ դեպքն իրականում տեղի է ունեցել հետևյալ կերպ.
2016թ. հունիսի 24-ին մեր տղաները Գյումրի քաղաքի ռեստորաններից մեկում նշել են իրենց ընկերոջ ծննդյան տարեդարձը: Ժամը 22:30-ի սահմաններում երկու մեքենայով վերադառնալիս են եղել գյուղ: Ճանապարհին միգուցե մի քիչ աղմկել են: Այդ պատճառով նրանց քաղաքացիական ավտոմեքենայով հետապնդել և հայհոյանքներ տալով կանգնեցրել են ՀՀ ոստիկանության Շիրակի մարզային վարչության Գյումրի քաղաքի Մուշի բաժնի ՔՀԲ պետ Խաչատուր Աշոտի Պետրոսյանը և նրա տեղակալ Հակոբ Գեղամի Աղաբեկյանը: Երբ տղաները կանգնեցրել են իրենց ավտոմեքենաները և իջել, իրենց մեքենայից իջել են Խաչատուր Պետրոսյանը և Հակոբ Աղաբեկյանը, որոնք եղել են քաղաքացիական հագուստով: Կարեն Համլետի Մարտիրոսյանը, որն ի դեպ հաշմանդամ է, վերջիններիս է մոտեցել, որպեսզի տեղեկանա, թե ովքեր են իրենց հայհոյողները և դրա պատճառը, սակայն այդ երկու անձինք՝ առանց ներկայանալու, որ ոստիկաններ են ու պատճառաբանություններ ներկայացնելու՝ վիրավորել ու հարվածել են Կարեն Մարտիրոսյանին: Տեսնելով, որ իրենց հաշմանդամ ընկերոջը ծեծում են, մյուս տղաները և աղջիկները ևս միջամտել են ու միջադեպը վերածվել է ծեծկռտուքի, որի արդյունքում երկու կողմերն էլ ստացել են մարմնական վնասվածքներ:

Որոշ ժամանակ անց մեքենայից իջել է ոստիկանության 3-րդ աշխատակիցը Տիգրան Դանիելյանը, մոտեցել են ճանապարհային ոստիկանները ու տղաները հասկանալով, որ իրենց հետ վիճաբանողները ոստիկաններ են՝ մի քանիսը դիմել են փախուստի, իսկ մի մասին բերման են ենթարկել ոստիկանության Մուշի բաժին, որտեղ ոստիկանության նույն աշխատակիցները, արդեն իրենց գործընկերների հետ շարունակել են բռնություն գործադրել տղաների, իսկ հաջորդ օրը նաև բերման ենթարկված աղջիկների նկատմամբ:
Այս ամենից հետո սկզբնական շրջանում Շիրակի մարզի քննչական վարչության վարույթում քննվող քրեական գործով սկսեցին ակտիվորեն գործ սարքել մեր երիտասարդների վրա, ինչը վրեժխնդիր լինելու և ոստիկանների մեղմ ասած ոչ պատշաճ վարքագծի և բռնությունների փաստերը թաքցնելու փորձ է, սակայն փաստաբանների օգնությամբ կարողացանք որոշակի առումով իրավիճակը շտկել ու դեպքի մասնակիցների մի մասը ոստիկանների ապօրինությունների վերաբերյալ չվախեցավ ցուցմունքներ տալ ու հանցագործության մասին հաղորդումներ ներկայացնել:

Ակնհայտ է, որ ուղղակի ապօրինի է ՀՀ քրեական օրենսգրքի 316-րդ հոդվածով առաջադրված մեղադրանքները ու դա հաստատվում է ապացույցների ճնշող մեծամասնությամբ:

Փոխարենը ավելի շատ ու հավաստի ապացույցներ կան ոստիկանության աշխատակիցների կողմից իրենց լիազորությունները չարաշահելու փաստերի վերաբերյալ, սակայն վիճաբանությունը սադրող ոստիկանության աշխատակիցներն այսօր ոչ միայն հանդես են գալիս տուժողի կարգավիճակում, այլև շարունակում են իրենց աշխատանքը:
Ընդ որում նրանք հենց այս գործով ակտիվորեն միջամտում են նախաքննության կատարմանը, ինչն անթույլատրելի է, իսկ մեր տղաները, որոնք ավելի շատ զոհի կարգավիճակում են, կալանավորված են:

Հարկ ենք համարում նշել, որ մեր տեղեկություններով բազմաթիվ են ՀՀ ոստիկանության Մուշի բաժնի ծառայողների կողմից նմանատիպ միջադեպեր սադրելու և ՀՀ քրեական օրենսգրքի 316-րդ հոդվածով գործեր սարքելու փաստերը: Հատկանշական է, որ համաձայն մեզ հասած տվյալների, նմանատիպ միջադեպերի կենտրոնում հաճախ հայտնվել են հենց Խաչատուր Աշոտի Պետրոսյանն և նրա տեղակալ Հակոբ Գեղամի Աղաբեկյանը:

Մենք հույս ունենք, որ Ձեր հետևողական հսկողության պայմաններում այս գործով արդարությունը կվերականգնվի, որն ապահովելու համար Ձեզ խնդրում ենք՝

1. Մինչև սույն քրեական գործի ավարտը՝ դադարեցնել ՀՀ ոստիկանության Շիրակի մարզային վարչության Գյումրի քաղաքի Մուշի բաժնի ՔՀԲ պետ Խաչատուր Աշոտի Պետրոսյանի, ՔՀԲ պետի տեղակալ Հակոբ Գեղամի Աղաբեկյանի և ՀՈԲ տեսուչ Տիգրան Ռաֆիկի Դանիելյանի լիազորությունները կամ առնվազն գործուն միջոցներ ձեռնարկել, որպեսզի այդ անձինք, ինչպես նաև ՀՀ ոստիկանության Շիրակի մարզային վարչության այլ աշխատակիցները հնարավորություն չունենան միջամտել գործի ընթացքի վրա՝ ականատեսների վրա անօրինական ազդեցություն գործադրելու, այլ ապացույցների բովանդակությունը ոստիկանների օգտին և ի վնաս մեղադրյալների ձևափոխելու կամ այլ եղանակով:

2. Քրեական գործով նախաքննության կատարումը հանձնարարել քննչական մարմինների կենտրոնական ապարատների կամ այլ մարզի քննիչներին, քանի որ վստահ ենք, որ Շիրակի մարզի իրավապահ մարմինների աշխատակիցներն ակտիվորեն համագործակցում են իրար հետ, ուստի այս մարզում որևէ քննչական ստորաբաժանում չի կարող այս գործով անաչառ քննություն կատարել:

3. Կողմերի հավասարությունն ապահովելու համար կամ արգելանքից ազատել այս գործով կալանքի տակ գտնվող Արթուր Գևորգի Խաչատրյանին, Սեյրան Հմայակի Մարտիրոսյանին, Կարեն Համլետի Մարտիրոսյանին և Էդիկ Ցոլակի Սարգսյանին կամ ապօրինի տուժող ճանաչված, իսկ իրականում առերևույթ հանցանք կատարած ոստիկաններին ևս մեղադրանք առաջադրել և նրանց նկատմամբ ևս որպես խափանման միջոց ընտրել կալանավորումը:

Սրանք ամենևին էլ առաջ քաշվող պայմաններ չեն, քանի որ մենք միտված չենք պայմաններով խոսելու, այլ գործի արդար քննության ապահովմանն ուղղված միջոցներ են, հետևաբար կարծում ենք, որ դրանք Ձեր կողմից պատշաճ կարգով կքննարկվեն, իսկ արդյունքում գործի քննության ընթացքի արդարությունն ու անաչառությունը կասկածներ չի հարուցի:

Վստահեցնում ենք Ձեզ, որ Արթուր Խաչատրյանը, Սեյրան Մարտիրոսյանը, Կարեն Մարտիրոսյանը և Էդիկ Սարգսյանը շատ խելոք, օրինապահ, հայրենասեր և աշխատասեր երիտասարդներ են: Նրանք բոլորն էլ իրենց քրտինքով են ստեղծում իրենց ընտանիքի ապրուստի միջոցները:

Դիմելով Ձեզ՝ անգամ խնդրում ենք հանձնարարել նրանց նկատմամբ ընտրել կալանքի հետ չկապված խափանման միջոց և ողջ համայքով վստահեցնում, երաշխավորում ենք, որ այդ դեպքում նրանցից որևէ մեկը չի խախտի այդ խափանման միջոցի պայմանները:

Նախապես հայտնում ենք շնորհակալություն»: