Խոսրով Հարությունյանը Բալասանյանին թերություններով է ընդունում

Օրերս ՀՀԿ Շիրակի մարզային կառույցի պատասխանատու Սահակ Մինասյանը հայտարարությամբ է հանդես եկել, ասել է, որ Գյումրիի ավագանու 2016 թվականի ընտրություններին դաշինքով մասնակցելու համար քննարկումներ են եղել տարբեր կուսակցությունների հետ, առաջարկ են ստացել «Քրիստոնեա-դեմոկրատական միության» Շիրակի տարածքային կազմակերպության կողմից ու համաձայնել են հենց այս կուսակցության հետ դաշինք կազմել ու սատարել գործող քաղաքապետ Սամվել Բալասանյանի թեկնածությունը:

Newspress.am-ը «Քրիստոնեա-դեմոկրատական միության» նախագահ Խոսրով Հարությունյանից հետաքրքրվեց, թե ինչպես է կայացել Բալասանյանին դաշինքով սատարելու որոշումը, որին ի պատասխան Խ. Հարությունյանը պատասխանեց, որ կուսակցությունը որոշում է կայացրել մասնակցել տեղական ինքնակառավարման ոլորտի բարեփոխումներին, նաև կուսակցությունը կարևորում է հատկապես այն, որ Գյումրիում փորձ է արվում կիրառել Երևանի մոդելը, որտեղ ավագանին բացառիկ դերակատում ունի: Դերակատարումը պայմանավորված է քաղաքական կուսակցությունների մասնակցությամբ:

Նա նաև ընդունեց, որ «Քրիստոնեա-դեմոկրատական միությունն» ազդեցիկ կուսակցություն չէ, որն ի դեպ գիտակցում են: Եվ թեկուզ Բալասանյանի գործունեության ընթացքում նկատել են թերություններ և բացթողումներ, սակայն Բալասանյանին արժանի են համարում: Հարցին, թե Բալասանյանին ո՞ր գործերի համար են վստահում, Խոսրով Հարությունյանը պատասխանեց, որ ինքը քաղաքապետի աշխատանքի մեծ փորձառություն ունի և գիտի, թե ինչ է նշանակում քաղաքապետ լինելը:

Դիտարկմանը, թե գյումրեցիները գոհ չեն քաղաքապետից, Խոսրով Հարությունյանը պատասխանեց, որ քաղաքի մի հատվածը կարող է գոհ լինել, մյուս հատվածը՝ դժգոհ. «Ֆինանսա-տնտեսական ճգնաժամային հանգամանքով պայմանավորված` Գյումրիում քաղաքաշինության, կառուցապատման ոլորտում էական դրական տեղաշարժ է կատարվել, սակայն եթե ասել, որ Գյումրին խնդիր չունի, այդպես չէ»:

Ինչ վերաբերում է անօթևանների խնդրին, ապա Խ. Հարությունյանը նշեց, որ թեև մինչև այժմ անօթևաններ ունենք, սակայն Հայաստանի տնտեսական կարողություններից ելնելով` տիտանական աշխատանք է կատարվել, հատկապես վերջին 10-15 տարում և «այսօր չենք կարող ասել, որ Գյումրին աղետի գոտի է»:

Խոսրով Հարությունյանին նաև չի անհանգստացնում, որ Սամվել Բալասանյանը մի քանի կուսակցություն է փոխել և այդ կուսակցություններում զբաղեցրել է կարևոր պաշտոնները, ըստ նրա, պատասխանատու պաշտոններ զբաղեցնելը խոսում է Բալասանյանի պոտենցիալի մասին: Դիտարկմանը, թե վաղը կարող է Բալասանյանն այլ կուսակցություն փոխել, ասաց, որ քաղաքապետը կուսակցական պաշտոն չէ, այլ կարևոր է կարողանալ վարել քաղաքապետի պաշտոնը:

Բացի այդ նա հիշեցրեց, որ վերջերս Սամվել Բալասանյանը վարկային պայմանագիր է ստորագրել՝ Գյումրու 10 կարևոր փողոցների վերանորոգման համար, որն ապահովելու է 300 աշխատատեղ, լուսավորություն և այլն: Գյումրին ստանալու է 22 մլն դոլար վարկ, որից 7 մլն դոլարը դրամաշնորհ է, վարկ տրվել է 0.75 տոկոսադրույքով:

Իսկ թե ինչո՞ւ Հրազդանում «Քրիստոնեա-դեմոկրատական միությունը» չի սատարել ՀՀԿ-ական Արամ Դանիելյանին, Խ. Հարությունյանը նշեց, որ Հրազդանում իրենց կուսակցությունը մասնաճյուղ չունի: