Հիմա Ստալինգրադը լիներ, բոլորը պաշտոնյաները գնացել-կռվել էին. Լևոն Շիրինյան

Վերադառնում ենք 1994 թ. բանաձևերին և բլեֆներին, ընդ որում` եթե այն ժամանակ հայկական կողմից զիջումների մասին չէին խոսում, հիմա փոխզիջման անվան տակ միակողմանի զիջում է: Այդ մասին Newspress.am-ի թղթակցի հետ զրույցում ասաց քաղաքագետ Լևոն Շիրինյանը: Անդրադառնալով ղարաբաղա-ադրբեջանական հակամարտ զորքերի շփման գծում գիշերվա լարվածությանը` քաղաքագետն արձագանքեց, որ զարմանալու ոչինչ չկա, քանի որ հույսն Էրդողանի վրա էր:

«Այդպես էլ պետք է լիներ, ի՞նչ կա զարմանալու, էլի հույսներն Էրդողանի վրա են դրել: Միջազգային միջնորդներ և երաշխիքներ. այդպիսի բաներ չկան, չկա միջազգային ոչ մի երաշխիք: Բացի մեր պետականությունից ու բանակից, ոչ մեկի վրա հույս դնել չենք կարող: Երբ մենք մեզ տեր ենք եղել, լավ էլ հարցերը լուծել ենք, ուղղակի մենք միշտ սովոր ենք, որ մեզ օտարները կերակրում են աջից-ձախից` մեր միջի օտարների միջոցով, խաղաղապաշտ հոգեկան հիվանդությամբ տառապող հայերիս»:

Հարցին, թե լարվածությունը շարունակակա՞ն կլինի, Լևոն Շիրինյանն ասաց, որ ինքը բազմիցս նշել է` մինչև հայկական կողմը պատերազմը չտեղափոխի Ադրբեջանի տարածք, ոչ մի արդյունք չի լինի:

«Ադրբեջանցիները Պուտինի հետ գործարքի մեջ են: Հիմա մի քիչ «բլեֆ» կանեն, կանցկացնեն իրավիճակը. մարդ են մորթել, գլուխ են կտրել…: Ես բազմիցս ասել եմ` մինչև հայկական կողմը պատերազմը չտեղափոխի Ադրբեջանի տարածք, ոչ մի արդյունք չի լինելու, էդ դեպքում պետք է առաջարկել բոլոր պաշտոնյաների ընտանիքների երեխաները մեկնեն ռազմաճակատ, խրամատ: Ուրիշի խաթրի համար ապրող ժողովուրդն էդպես է լինում, էս ժողովուրդն ապրում է Ռուսաստանի խաթրին: Հիմա Ստալինգրադ լիներ, բոլոր պաշտոնյաները գնացել-կռվել էին»: