Էթիկայի հանձնաժողով. հարուստներով իրար գտել են

Երբ ստեղծվեց Բարձրաստիճան պաշտոնատար անձնանց էթիկայի հանձնաժողովը, ենթադրվում էր, որ բարձրաստիճան անձանց եկամուտները հայտարարագրելով ինչ-որ բան կփոխվի, հանրությանը կիմանա, թե ով ինչքան գումար է վաստակել. իհարկե, հանրությանը հետաքրքիր էր, թե անօրինական ճանապարհով ինչպես են հարստացել պաշտոնյաները:

Սակայն այս տարիներին պաշտոնյաների անօրինական եկամուտների բացահայտում չեղավ, իսկ Էթիկայի հանձնաժողովն առանձնապես լծակներ էլ չուներ որևէ բան բացահայտելու:

Կարելի է ասել` ոչ թե լծակ չունի բացահայտելու անօրինական եկամուտները, այլ նաև ցանկություն չունի, որովհետև այս դեպքում Էթիկայի հանձնաժողովի նախագահ Սիրանույշ Սահակյանը, ով ներկայացրել է 2015 թվականի հայտարարագիրը, պետք է պատասխաներ, թե այդ որտեղից 57 մլն դրամ, որով բնակարան է կարողացել գնել: Դատելով գումարից` ենթադրվում է, որ այն քողտիկ չէ արվարձանում:

Սիրանույշ Սահակյանը 2015թ. ունեցել է 7 հազար 200 ԱՄՆ դոլար և 23 հազար շվեյցարական ֆրանկ:

Երբ խոսվում է, որ Հայաստանն աղքատ երկիր է և տնտեսությունը զարգացնելու համար գումարներ չունի, ներդրումների պակաս կա, ապա բավական է նայել Էթիկայի հանձնաժողովի կայքը՝ հասկանալու համար, որ մեր երկիրը որևէ հարուստ երկրի չի զիջում, դեռ մի բան էլ ավելի: Պարզապես շատ հարուստ պաշտոնյաները, կամ պաշտոնյաներին կցված ազգականներ բիզնես են դնում արտերկրում` այդպիսով խուսափելով հարազատ երկրի հարազատ հարկային, մաքսային, հաշվապահական և այլ կատարելագործությունից հեռու համակարգերից:

Սիրանույշ Սահակյանի հայտարարագրում չի նշվում, թե նրան որտեղից այդ 57 մլն կլորիկ գումարը, որով նա բնակարան է գնել, սակայն նման հարց տվող անձ կամ կառույց Հայաստանում չկա, այնպես որ հանգիստ կարող են հայտարարագրել, թեկուզ ունեցվածքի մի մասը: Միևնույն է` որևէ մեկը որևէ մեկին չի հարցնելու, թե որտեղից, քանի որ այդ դեպքում Էթիկայի հանձաժողովում հայտարարագրվածները պետք է այդ հարցին պատասխանել, որը դժվար է ու չեն էլ հարցնում՝ լսող չկա:

Իսկ եթե Սիրանույշ Սահակյանը համեստ եկամուտ ունենար, ասենք` ամսական նվազագույն աշխատավարձ, հաստատ նրան կհետաքրքրեր, թե այդ որտեղից պաշտոնայներին այդքան միլիոններ, սակայն եթե բոլորը պատասխանեն, նա ևս պետք է պատասխանի՝ որտեղից: