«ՄՅՈւ»-ի նոր աստղն ու հայ աղջիկների չիրականացված երազանքը. ռուսական մամուլի անդրադարձը` Մխիթարյանին

«Մանչեսթեր Յունայթեդը» ձևակերպեց այս ամառվա գլխավոր տրանսֆերներից մեկը` պայմանագիր ստորագրելով Հայաստանի ազգային հավաքականի և Դորտմունդի «Բորուսիայի» կիսապաշտպան Հենրիխ Մխիթարյանի հետ: Ինչ է նշանակում այս տեղափոխությունը ֆուտբոլիստի համար և ինչպես կփոխվի «Մանչեսթերի» խաղը: Այս և այլ հարցերի Հենրիխ Մխիթարյանին նվիրված իր հոդվածում անդրադարձել է Sportbox.ru-ն:

«Երկար ժամանակ է, ինչ «Մանչեսթեր Յունայթեդը» ֆուտբոլային հանրությանը չէր ներկայացել աղմկալի և որակյալ տրանսֆերներով: Մարսյալ, Դեպայ, Շվայնշտայգեր և Լուի Վան Գալի ժամանակաշրջանում մյուս ձեռքբերումները ոչ մի կերպ չեն կարող համեմատվել նրանց հետ, ովքեր «Մանչեսթեր» են տեղափոխվել մինչ Մոուրինյուի առաջին մարզումն անցկացնելը: Զլատան Իբրահիմովիչն ու Հենրիխ Մխիթարյանը կոչված են նոր կյանք հաղորդելու «Մանչեսթերի» հարձակման գծին:

«Օլդ Թրաֆորդ» է եկել ոչ թե հասարակ լավ ֆուտբոլիստ, այլ լավագույնը: Նրան լավագույնն են համարում ոչ միայն հայրենի Հայաստանում, որտեղ Մխիթարյանն ազգային հերոսի կարգավիճակ է ձեռք բերել: Նա անխտիր բոլոր երեխաների կուռքն ու աղջիկների չիրականացված երազանքն է: Մխիթարյանին լավագույնն են ճանաչել նաև Գերմանիայում: Ընդ  որում` և′ սպորտային պարբերականների, և′ Բունդեսլիգայի ֆուտբոլիստների հարցման արդյունքներով:

Մխիթարյանն անցած մրցաշրջանում ֆենոմենալ արդյունավետություն ցուցադրեց` խփելով 23 գոլ և դառնալով 24 գոլային փոխանցման հեղինակ` բոլոր մրցաշարերում անցկացրած 50 խաղում: Այսինքն` ստացվում է, որ «Բորուսիայում» հայ կիսապաշտպանն իր յուրաքանչյուր խաղում անմիջական մասնակցություն է ունեցել գրեթե բոլոր գոլերին:

Հեղինակավոր whoscored.com պարբերականի գնահատմամբ` Մխիթարյանը մրցաշրջանն ավարտել է Եվրոպայի լավագույն ֆուտբոլիստների ցանկում` զիջելով միայն Մեսսիին, Նեյմարին, Իբրահիմովիչին, Բեյլին, Ռոնալդուին, Սուարեսին ու Դի Մարիային: Ուշագրավ է այն փաստը, որ այս ցուցակում Անգլիայի առաջնությունում հանդես եկող որևէ ֆուտբոլիստի անուն չկա, ինչն է′լ ավելի մեծ է դարձնում «Մանչեսթերի» առավելությունը:

Մխիթարյանը մրցաշրջանն անցկացրել է կայուն և առանց անկումների: Նա մշտապես գոլեր է խփել և գոլային փոխանցումներ կատարել ինչպես Գերմանիայի առաջնությունում, այնպես էլ Եվրոպայի լիգայում, որտեղ ևս ընդգրկվել է առաջնության խորհրդանշական հավաքականում:

Նրա ցուցանիշներն առավել տպավորիչ են դառնում, երբ հիշում ենք նախանցյալ մրցաշրջանը, որտեղ ավելի շուտ նրա ստվերն էր դաշտում, քան ինքը: Իհարկե, այն հարցում, թե ինչպիսի բարձունքների է հասել հայ կիսապաշտպանը, մեծ ներդրում ունի Թոմաս Տուխելը:  «Բորուսիայի» մարզիչն անմիջապես հասկացավ, թե իր նոր թիմում ում վրա կարելի է խաղադրույքն անել, ամրացրեց Մխիթարյանի վստահությունը, ամբողջովին վստահեց Մխիթարյանին ու նոր մակարդակի բարձրացրեց: Այնպիսի մակարդակի, որտեղ քեզ թիրախավորում ու քեզ համար պայքարում են աշխարհի իսկապես լավագույն և մեծագույն ակումբները:

Հաճախ ֆուտբոլիստները, ովքեր նոր պայմանագիր են կնքում ինչ-որ ակումբի հետ, առաջին իսկ հարցազրույցում ասում են, որ մանկուց են երազել խաղալ այդ թիմում: Որպես կանոն, այդպիսի խոստովանություններից կեղծիքի հոտ է գալիս: Մխիթարյանը նույնպես խոստովանել է, որ «Յունայթեդի» մարզաշապիկը հագնելը ևս մանկական երազանք է եղել, ինչը, եթե հավատանք նրա ծանոթներին, մաքուր ճշմարտություն է: Ընթացիկ իրավիճակում «Մանչեսթեր Յունայթեդում», ուր նոր մարզչի գլխավորությամբ նոր թիմ է կառուցվելու, Հենրիխն ունի բոլոր շանսերը` դառնալու գլխավոր աստղը և այն խաղացողը, ում անունը երկար տարիներ կվանկարկեն «Օլդ Թրաֆորդում»: Այս թիմի կառուցմանը, և այն բանին, թե ով կդառնա այս թիմի համար Մխիթարյանը, անասելի հետաքրքիր է լինելու»,- եզրափակում է հոդվածագիրը: