Հանգստի բաղադրիչը կկասեցվի հաջորդ տարի. վարչապետի խոսքը փոխում է նախարարը

Սոցիալական փաթեթների հանգստի բաղադրիչը ժամանակավորապես կկասեցվի՝ սոցիալական փաթեթների հանգստի բաղադրիչում չաշահումները շարունակվել են: Այս մասին գործադիրի այսօրվա նիստում հայտարարեց ՀՀ վարչապետ Հովիկ Աբրահամյանը:

Առողջապահության պարտադիր բաղադրիչը սոցփաթեթով մնում է, իսկ հանգստի բաղադրիչն առայժմ կասեցվում է, քանի որ չարաշահումներ կան:

Նշենք, որ սոցփաթեթների ստեղծման շրջանից, եթե որևէ բաղադրիչից գոհ են եղել, հանգստի բաղադրիչն է եղել: Իհարկե, պատահել է, որ այն վաճառել են կամ գումարն ուղղել երեխայի ուսման վարձին: Այսինքն` ինչ-որ բանի այն ծառայել է:

Իհարկե, այժմ ընթանում է ուսումնասիրություն, և կպարզվի, թե հատկապես որ խախտումների և չարաշահումների մասին է խոսքը, սակայն ո′չ այս, ո′չ այն` հանգստի սեզոնին կասեցվում է սոցփաթեթների հանգստի բաղադրիչը, միտում է նկատվում: Թեև այժմ հնարավոր չէ որևէ հստակ ուղղություն կանխատեսել, սակայն տարիների փորձը ցույց է տվել, որ կառավարության արդարամտության վրա հույս դնողը հաստատ հանգստանալու չի գնա:

Թեև ավելի ուշ աշխատանքի և սոցիալական հարցերի նախարար Արտեմ Ասատրյանը պարզաբանեց, որ խոսքը վերաբերում է 2017-19 թթ., սակայն ոլորտում խառնաշփոթն անխուսափելի է:

Փորձը ցույց է տալիս, որ կառավարության որոշումներին համապատասխան կառույցները մինչև սովորում են, ընկալում են` արդեն տուժածներ են գրանցվում:

Նշենք նաև, որ եթե խոսք լիներ 2017-19 թթ. մասին, ապա վարչապետն այդ մասին ուղիղ կհայտարարեր նիստի ժամանակ, իսկ այն, որ ավելի ուշ հաղորդվեց այդ մասին` հերթական խաղն է: Նիստի ժամանակ վարչապետը հստակ հայտարարեց` առայժմ կասեցվում է:

Ինչպես ասում են` ձվի մեջ մազ ման չենք գալիս, սակայն վստահություն չկա անշահախնդիր կառավարության հեքիաթներից:

Եթե սոցփաթեթի հանգստի բաղադրիչից դժգոհություն լիներ, ապա այն կֆիքսեին համապատասխան կառույցները, սակայն դժգոհություն կա առողջապահական սուղ փաթեթից, որից օգտվելը մշտապես խնդրահարույց է եղել, սակայն այսօր դժգոհություն է հնչում հենց հանգստի փաթեթից: Այնպես որ կառավարությունը մաքուր չի խաղում և դարդը հանգստի մեկնողների իրավունքների պաշտպանությունը չէ:

Ավելի ուշ պարզ կլինի, թե ինչու են ընկել սոցփաթեթի հանգստի բաղադրիչի հետևից և ում են ցանկանում թակարդը գցել:

Newspress.am