Սահմանադրական հանրաքվեի վերաբերյալ ՄԻՊ զեկույցը միտումնավոր է ձգձգվում

Սահմանադրական հանրաքվեի մասին ՄԻՊ զեկույցը հանրաքվեից 7 ամիս անց դեռևս չի հրապարակվել, ՄԻՊ գրասենյակից դրա հրապարակման կոնկրետ ժամկետներ չեն նշում, միայն վստահեցնում են, որ հրապարակվելու է:

Երբ նախկին պաշտպան Կարեն Անդրեասյանը հրաժարական տվեց, զեկույցը գրեթե պատրաստ էր: Այն սուր էր, դրանում ընդգրկված էին հանրաքվեի օրը ձայների հաշվարկի խախտումների, քվեատուփերի լցոնումների, հանձնաժողովի անդամների կողմից թույլ տրված անօրինական գործողությունների, կրկնաքվեարկությունների և բազմակի քվեարկությունների, ընտրական գործընթացին անհարկի միջամտությունների բազմաթիվ դեպքեր ու այլ ընտրախախտումներ, ինչպես նաև կցված խախտումների վերաբերյալ բազմաթիվ տեսանյութեր:

Հրաժարականից հետո հանրային ու քաղաքական օրակարգում քննարկման առարկա դարձավ այն վարկածը, որ Անդրեասյանի հրաժարականի պատճառներից մեկը զեկույցն էր. իշխանությունները չէին ցանկանում, որ այն հրապարակվի:

Մարդու իրավունքների նոր պաշտպան Արման Թաթոյանի ընտրվելուց հետո հանրության հետաքրքրությունը հանրաքվեի մասին արտահերթ զեկույցի վերաբերյալ պահպանվեց: Ազգային ժողովի ընդդիմադիր քաղաքական ուժերը, լրագրողները փորձում էին Թաթոյանից հստակ պատասխան ստանալ՝ զեկույց լինելո՞ւ է, թե՞ ոչ, եթե այո, ապա՝ ե՞րբ: Վերջինս էլ հրաժարվում էր հրապարակավ կոնկրետ պատասխան հնչեցնելուց՝ միայն խոստանալով ուսումնասիրել զեկույցն ու անհրաժեշտության դեպքում՝ հրապարակել:

Դեռևս այս տարվա փետրվարի 24-ին պաշտոնն ստանձնած Թաթոյանը, փաստորեն, մինչև հիմա զեկույցն ավարտին չի հասցրել, և սա այն դեպքում, երբ զեկույցն, ինչպես արդեն վերը նշեցինք, գրեթե պատրաստ էր, երբ հանրաքվեից ընդամենը երկու ամիս անց դրա վերաբերյալ ԵԱՀԿ/ԺՀՄԻԳ-ն հասցրեց հրապարակել փորձագիտական խմբի վերջնական ու բավականին կոշտ զեկույցը՝ բաղկացած է ութ բաժնից:

Հատկանշական է, արդեն 5 ամսից ավելի հանրաքվեի զեկույցն ավարտին չհասցնող Թաթոյանը պաշտոնն ստանձնելուց հետո ընդամենը մեկ ամիս անց հասցրեց ուսումնասիրել և հրապարակել Մարդու իրավունքների պաշտպանի տարեկան՝ հաստափոր զեկույցը, որը բաղկացած է 455 էջից, և, որում, ի դեպ, հանրաքվեի օրվա վերաբերյալ որևէ նշում արված չէր:

Ստացվում է, որ ՄԻՊ գրասենյակն ընդամենը մեկ օրվա խախտումների վերաբերյալ զեկույցը մի քանի անգամ ավելի երկար ժամանակահատվածում է ուսումնասիրում, քան ՄԻՊ գրասենյակի մեկ տարվա աշխատանքը, որից կարելի է եզրակացնել, որ այդ զեկույցի հրապարակումը միտումնավոր է ձգձգվում մինչև դրա վերաբերյալ հանրային հետաքրքրությունը վերջանականապես կմարի:

Newspress.am