Ծառուկյանի մարզպետ փեսայի գեղագիտական հաճույքը

Մոտ մեկ տարի առաջ կառավարության որոշմամբ Կոտայքի մարզպետի պաշտոնն ստանձնեց ԲՀԿ նախկին առաջնորդ Գագիկ Ծառուկյանի փեսան` Կարապետ Գուլոյանը, ով մարզպետից առաջ աշխատել է որպես քննիչ, հետո դատախազ, երկու անգամ ընտրվել էր Աբովյանի քաղաքապետ:

Մեկ տարի առաջ Հովիկ Աբրահամյանն արդեն մարզպետ Գուլոյանին բեղմնավոր աշխատանք մաղթեց: Այդ աշխատանքի առաջին բեղուն ծիլերը նկատվեցին Հրազդանի քաղաքապետի ընտրություններում, դրանից առաջ և հետո: «Ես` որպես մարզպետ քթել եմ, որ Հրազդանի քաղաքապետի պաշտոնում տեսնում եմ Արամ Դանիելյանին, ինչի՞ չեզոք դիրք ընտրեմ»,- իր սատարումն Հրազդանի ՀՀԿ-ական թեկնածու Արամ Դանիելյանի` այսպես էր մեկնաբանել նույն ՀՀԿ-ի պարտադրմամբ քաղաքական դաշտը թողած Գագիկ Ծառուկյանի մարզպետ փեսան:

Պարզվում է, սակայն, որ Արամ Դանիելյանին սատարելու որոշումն այլ դրդապատճառ էլ է ունեցել: Ըստ օդում կախված լուրերի` Ծառուկյանի մարզպետ փեսան մինչ ընտրությունները բավականին մատչելի գնով ձեռք է բերել Հրազդանի քաղաքապետի բիզնեսներից մեկը` Աբովյան-Հրազդան մայրուղում գտնվող գազալցակայանը: Նույն մայրուղու մեկ այլ հատվածում առաջիկայում կգործարկվի մեկ այլ գազալցակայան որը, ըստ օդում կախված լուրերի, ևս պատկանում է Կոտայքի երիտասարդ մարզպետին, ինչը նրա բեղմնավոր աշխատանքի երկրորդ հատվածն է:

Ի դեպ, մայրուղու վրա գազալցակայան կառուցելը տրամաբանական է, քանի որ, ինչպես ասում են, բիզնեսը տիրոջ աչքի առաջ կլինի, իսկ Կոտայքի մարզպետն ամեն օր անցնում է Աբովյան-Հրազդան մայրուղով: Հենց այդ մայրուղու վրա է գտնվում ճանաչված քանդակագործ Խաչատուր Միրիջանյանի 1980-ականին ստեղծած հայտնի աշխատանքը՝ Չարենցավանում տեղադրված «Գանգրահեր տղան» հուշարձանը, որից միայն երկաթե մի քանի ժանգոտված կմախքներ են մնացել:

Ժամանակին Վազգեն Սարգսյանը նման կիսաքանդ ինչ-որ բան տեսնելիս ասում էր` էս զիբիլն էստեղից մաքրել ա պետք: Արդեն տևական ժամանակ է, որ Ծառուկյանի մարզպետ փեսան իր ճանապարհին տեսնում է այդ թալանված արձանը, բայց կամ չտեսնելու է տալիս, կամ էլ այդ թալանված արձանից գեղագիտական հաճույք է ստանում: Չտեսնելու տարբերակը կարելի է միանգամից բացառել, քանի որ Կարապետ Գուլոյանն ունի քննիչին ու դատախազին հարիր սուր աչք, հետևաբար` մնում է երկրորդ տարբերակը` թալանի գեղագիտական հաճույքը, որն ամեն օր ստանում է մարզպետը: