Ոչ ոք չի սպասել վերադասի կրակի հրամանին. Սեյրան Օհանյան

ՊՆախարար Սեյրան Օհանյանը, թեև ներկա չէր ապրիլյան պատերազմում զոհված փոխգնդապետ Ալեքսան Առաքելյանի հուղարկավորությանը, սակայն ներկա էր Գյումրիում փոխգնդապետի անունը կրող պուրակի բացմանը: 

Նախարարի խոսքով` ապագան պետք է կառուցել` հենվելով դրականի վրա: Օհանյանն անդրադարձել է ապրիլյան պատերազմի օրերին առանձին օղակների աշխատանքին. «Ապրիլյան պատերազմը եղել է առանձնահատուկ, և բոլոր օղակների հրամանատարները գործել են ինքնուրույն և կարողացել են տեղում որոշումներ ընդունել և փոքր ուժերով խնդիրներ կատարել: Այդ սկզբունքն այսօր միջազգային առումով անվանվում է հրամանադրում առաջադրանքով, որը մենք զարգացրել և հասցրել ենք ծրագրային գործունեության: Այսօր ՀՀ և ԼՂ պաշտպանության բանակի յուրաքանչյուր օղակ իրեն ընձեռնված մարտական խնդիրներում ինքնուրույն է գործում: Այն տեսանյութը, որը տեղադրվել էր սոցիալական ցանցում. այդ դիրքում տեղադրված տեխնիկական պայմաններում է, որ տվյալ մարտական գործողության ժամանակ տվյալ դիրքի անձնակազմը հասել է հաջողության՝ ամբողջությամբ ոչնչացնելով ու հետ մղելով այդ խումբը: Կա նաև բնազդային իրավիճակ. ոչ մեկը, դիրքում գտնվելով, երբ վտանգ է զգում, չի սպասի վերադասի հրամանին՝ կրակել, թե չկրակել՝ իր կյանքը փրկելու համար։ Այդ ամենը՝ կրակի հրաման չտալը, հենց այնպես խոսակցություն է»,- ասել է Սեյրան Օհանյանը, միաժամանակ խորհուրդ տվել չհավատալ այլ խոսակցություններին: