«ՉԻ». Գզվռտոց ու «խլոցի» հայկական ձևով

«Չորրորդ իշխանություն» թերթը գրում է.

«ՉԻ» տեղեկություններով՝ իշխանության առանձին դեմքերի շրջանակներում գզվռտոց է սկսվել իրենց սեփականությունը թղթերով «ամրագրելու» հարցում:

Հանրապետության հրապարակում, իսկ ավելի որոշակի՝ ՀՀ գլխավոր դատախազության դիմաց գտնվող այգում դժվար է չնկատելու տալ սրճարանները: Դրանց առատությունն ու դիրքն անգամ փակել են անցորդների ճանապարհը: Ճիշտ է, ցանկապատ չկա, բայց անցորդների համար բավականին անհարմար է դարձել այգով ճանապարհի որոշակի մասն անցնելը:

Մեր տեղեկություններով՝ երևանցիներին հայտնի «դատախազության այգու» սրճարաններից մեկը պատկանում է Արմեն Գաբուզյանին, որը ոչ վաղ անցյալում եղել է իրավապահ համակարգի ճանաչված դեմքերից մեկը: Ասում են, որ նա խնամիական հարաբերություններ ունի արտակարգ իրավիճակների նախարար Արմեն Երիցյանի հետ:

Նրան պատկանող այգու հարևանությամբ տարածք ունի նաև Ռուբեն Սադոյանը, որը ՀՀԿ-ական է և պատգամավոր է դարձել Կենտրոն համայնքն ընդգրկող թիվ 9 ընտրատարածքից:

Շրջանառվող խոսակցությունների համաձայն՝ Սադոյանը ցանկանում է իր ունեցած տարածքն ընդլայնել Գաբուզյանի սրճարանի տարածքի հաշվին: Ընդ որում՝ այդ ամենը Սադոյանը որոշել է անել թուղթ-թանաքով: Ռուբեն Սադոյանն էլ, ինչպես գիտեք, պատահական մարդ չէ: Նա համարվում է ՀՀ կապի և տրանսպորտի նախարար Գագիկ Բեգլարյանի հովանավորյալը: Բազմաթիվ հարցերում, եթե չլիներ Բեգլարյանի գործոնը, ապա դժվար թե Սադոյանը հաջողեր: Ինչո՞ւ ենք այս հանգամանքը նշում. մեկ պատճառով միայն՝ Սադոյանը վերստին կարող է դիմել Բեգլարյանի միջամտությանն ու օգնությանը: Բոլոր դեպքերում խոսքը «խլոցու» մասին է, որտեղ Սադոյանը հաստատ լրացուցիչ ուժերի կարիք կունենա»:

Մանրամասները՝ թերթի այսօրվա համարում