Զինվորին ծեծի ենթարկելու գործը կարճվել է

Մեղրիի զորամասում զինծառայող Արթուր Հակոբյանին ծեծի ենթարկելու վերաբերյալ քրեական գործը շուրջ 7 ամիս քննվելուց հետո կարճվել է՝ հանցադեպի բացակայության հիմքով: Այս մասին Newspress.am-ին ասաց Արթուր Հակոբյանի փաստաբան Արա Ղարագյոզյանը: Գործում այդպես էլ որևէ անձ մեղադրյալի կարգավիճակ չի ստացել՝ չնայած զինծառայողի պնդումներին, այն մասին, որ իրեն ծեծի է ենթարկել իր զորամասի հրամանատար Ջիվան Մկրտչյանը:

Ծառայելու նպատակով Ռուսաստանից հայրենիք վերադարձած Արթուրը հոգեկան առողջության հետ կապված խնդիրներով Մուրացանի հոսպիտալ էր տեղափոխվել 2015-ի նոյեմբերին: Տղայի՝ հոսպիտալում գտնվելու մասին հարազատները պատահաբար էին իմացել: «Ջիվանն ինձ ծեծեց, Ջիվանն ինձ նեղացրեց»,- հոսպիտալում գտնվելու ընթացքում շարունակ կրկնում էր ծեծված զինծառայողը: Փաստաբան Ղարագյոզյանը դեռևս գործի կարճման որոշումը նախաքննություն իրականացնող մարմնից չի ստացել: Որպես գործի՝ ոչ օբյեկտիվ և բազմակողմանի քննված լինելու ապացույց բավարար է համարում մատնանշել միայն այն հանգամանքը, որ Ջիվան Մկրտչյանի և Արթուր Հակոբյանի միջև առերեսում տեղի չի ունեցել:

Նշենք, որ Քրեական դատավարության օրենսգրքի համաձայն՝ առերեսումը կատարվում է երկու այն անձանց միջև, որոնց ցուցմունքներում էական հակասություններ կան: Այս դեպքում Արթուր Հակոբյանը պնդում է, որ իրեն ծեծի է ենթարկել Ջիվան Մկրտչյանն, իսկ վերջինս կտրականապես հերքում է զինծառայողի խոսքերը, ուստի ակնհայտ է այս երկու անձանց տված ցուցմունքներում առկա էական հակասությունը:

Ըստ փորձագետների՝ Արթուր Հակոբյանի մոտ հոգեկան առողջության հետ կապված խնդիրներն առաջացել են ծառայության ընթացքում և հավանական է՝ եղել են սթրեսի հետևանք: Փաստաբանը պնդում է` տղայի մոտ սթրեսն առաջացել է անմարդկային և դաժան վերաբերմունքի պատճառով, և հենց այս հանգամանքն է, որ պետք է նախաքննություն իրականացնող մարմնի կողմից քննության առարկա դառնար:

«Ի՞նչ է նշանակում անձը մեկ տարի ծառայում է բանակում, և ապա այնտեղ հոգեկան խնդիրներ է ձեռք բերում: Եթե այդ խնդիրները ոչ թե դաժան ու անմարդկային վերաբերմունքի հետևանք լինեին, այլ ուղղակի կապված լինեին ծառայության, միջավայրի փոփոխության հետ, ապա զորակոչվելուց անմիջապես հետո կառաջանային, այլ ոչ թե մեկ տարի անց»,- համոզված է փաստաբանը: Վերջինս բարձրաձայնեց նաև այն մասին, որ Պաշտպանության նախարարությունը մինչև այս պահը զինծառայողի թոշակավորման հարցը չի լուծել: «Առողջ երիտասարդը դարձել է հոգեկան առողջության հետ կապված խնդիրներ ունեցող անձ և հիմա պետության կողմից ոչ մի կերպ չի հովանավորվում : Սա այն դեպքում, երբ անձը որոշում ունի այն մասին, որ հիվանդությունը ծառայության ընթացքում է ձեռք բերել»,- ընդգծեց Ղարագյոզյանն ու վստահեցրեց, որ նախաքննական մարմնի կողմից գործի կարճման որոշումն ստանալուց հետո անպայման բողոքարկելու է այն:

«Բողոքարկելու ենք Դատախազություն, եթե արդյունքի չհասնենք, հասնելու ենք մինչև ՄԻԵԴ, քանի որ այս ամենում առկա է Կոնվենցիայի երրորդ հոդվածի խախտում»,- ասաց փաստաբանը: Արթուր Հակոբյանի մորաքույրը՝ Ռիտա Հակոբյանը մեզ հետ զրույցում նշեց, որ Արթուր Հակոբյանի առողջական վիճակը վերջին մի քանի օրերի ընթացքում դարձյալ վատացել է. վերջինս գտնվում է Ավան հոգեբուժական հիվանդանոցում, ջերմաստիճանը չի իջնում, չի բացառվում, որ պատճառը կարճման որոշումն իմանալն է: Արթուրի հոգեկան վիճակը մինչև հիմա զինվորական համազգեստ տեսնելիս կտրում վատանում է. նա շարունակում է պնդել, որ իրեն ծեծի է ենթարկել Զիվան Մկրտչյանը:

Մորաքույրը վստահեցնում. իրենք ամեն ինչ անելու են՝ երեխային այդ վիճակին հասցնելու համար մեղավոր անձանց պատասխանատվության ենթարկելու համար: «Իրենք իրենց մեջ փակել ու կարճել են գործը, ո՛չ զանգել են մեզ, ո՛չ հետաքրքվել: Ինձ ասում էին, որ Ջիվանը պինդ մեջք ունի, դուք ոչինչ չեք կարող անել, ու փաստորեն այդպես էլ եղավ: Բայց մենք կսպասենք կարճման որոշմանը և կբողոքարկենք այն»,- ասաց Ռիտա Հակոբյանը: