Հովիկ Աբրահամյանը ժանտախտի ժամին խրախճանք է կազմակերպում

Կառավարությունը 17 մլն 814 հզր դրամ արժողության LEXUS GX 4.6 GAS մակնիշի մեքենա հատկացրեց Տարածքային կառավարման և զարգացման նախարար Դավիթ Լոքյանին: Դավիթ Հարությունյանի պնդմամբ` որպեսզի նա մարզեր հասնի բարձր անցողունակություն ունեցող մեքենայով:

Այստեղ են ասել՝ իշտահներիդ քացախ, ժանտախտի ժամին իսկական խրախճանք եք կազմակերպել Լոքյանի համար: Մի քանի օր է, ինչ Արթիկի բնակիչները սելավաջրերի մեջ են քնում ու արթնանում, հաց ուտում ու աղերսում, որ պետությունն օգնության ձեռք մեկնի, գործադիրն, առաջնահերթության զգացումը կորցրած, Լոքյանի հարմարավետության մասին է մտածում:

Հիմա ի՞նչ, Լոքյանն իր արագընթաց LEXUS -ով ճանաչողական ա՞յց է կատարելու Արթիկ, որ անձամբ տեսնի, թե ինչպես են մարդիկ բնական տարերքի դեմ մնացել միայնակ ու անօգնական: Հետո LEXUS-ն ի՞նչ արագընթաց է, որ Զարգացման նախարարը կարողանա հրատապ արձագանքել ֆորս-մաժորային իրավիճակներին, նման դեպքերում ավելի ճիշտ չէ՞ր մի ուղղաթիռ հատկացնել, որից հա′մ չուզողների աչքը դուրս կգար, հա′մ նախարարն ավելի վերևից կնայեր, հա′մ էլ ցեխաջրերից ու տարերքից տուժած բնակիչների բողոքներից ապահովագրված կլիներ:

Նշենք, որ գործադիր իշխանության տարբեր օղակների ծառայողական մեքենաների կրճատումը շոշափելիորեն չի ազդել պաշտոնյաների աշխատանքային կենսակերպի վրա. հիմնականում կրճատել են հին, մաշված, շարքից դուրս եկած մեքենաները, կարճ ասած` թոզփչոցի է եղել:

Հիմա էլ Դավիթ Լոքյանին ոչ միայն մեքենա կտան, այլև Դավիթ Լոքյանի տեղակալներին, վարչությունների պետերին, նախարարության ամեն տեսակ պաշտոնյաներին, կարճ ասած` կառավարությունը ոչ թե մեքենաների կրճատում իրականացրեց, այլ «քրջի բազարի» ապրանքը հանեց շարքից, որը որևէ մեկին չէր ծառայում, սակայն որի միջոցով տարեկան միլիոնավոր դրամների ծախս էր դուրս գրվում: Իսկ ո՞վ է հատկացնելու մեքենաները, իհարկե, կառավարությունը, որը չի կարող որևէ նախարարի, տեղակալների, անհասկանալի ԾԻԳ-երի ղեկավարների, նրանց տեղակալների սիրտը կոտրել: Սրանք մարդիկ են, որ մի օր պետք են գալու, արժի ինչ-որ էժանագին LEXUS-ի համար նրանց նեղացնել, հատկապես որ կլանների, ընտրությունների խնդիր կա առջևում: Կառավարության ձեռքին ճար լիներ, պարզապես արագընթաց ուղղաթիռներ կնվիրեր: Այսպես Հովիկ Աբրահամյանը մի ձեռքով մաքրում է ծառայողական հնաոճ մեքենաները` ասելով, թե գնում է պետական միջոցների խնայողության, մյուս ձեռքով պետական միջոցները վերածում ծառայողական LEXUS-ների:

Newspress.am