Իշխանությունն ամեն ինչ քանդեց, ավերեց ու հավասարեցրեց հողին. Զոյա Թադևոսյան

ՀՀԿ խմբակցության ղեկավար Վահրամ Բաղդասարյանն անդրադարձել է կառավարության հնարավորությունների վերաբերյալ քննադատություններին` ասելով. «Դրա մասին խոսում են մարդիկ, ովքեր ժամանակին ղեկավարել են կառավարությունը: Ամեն ինչ պետք է նայել հնարավորությունների դաշտում: Հարյուրապատիկ ու հազարապատիկ այս կառավարությունը մեծացրել է հնարավորությունները»:

Հասկանալու համար, թե ինչ հնարավորությունների մասին է խոսում ՀՀԿ խմբակցության ղեկավարը, Newspress.am– կապ հաստատեց տնտեսագետ Զոյա Թադևոսյանի հետ, ով Բաղդասարյանի հայտարարությանն այսպես արձագանքեց.

«Ես տեսնում եմ հնարավորությունների կորուստ և ոչ մի ավելացում: Այս իշխանություններն ինչ ունեին կորցրին, ավերեցին, քանդեցին, հավասարեցրին հողին: Ի՞նչ հնարավություններ ունենք: Հենց այն, որ մենք դիմում ենք նման պայմանագրերի ստորագրմանն ու համագործակցությունը տանում ենք ռազմավարական առումով ավելի կարևորագույն ոլորտներում, որով յուրաքանչյուր ազգային իշխանություն հաստատում է իր ինքնիշխանությունը, նշանակում է` հնարավորությունների կորուստ: Նրանք պարտավոր են այդպես ասելու: Եթե պատասխանատու են իրենց պաշտոնավարման արդյունքների համար, հետևաբար պարտավոր են այդ արդյունքներն ուռճացնելու, բայց այն, ինչ-որ մենք տեսնում ենք, և ինչ արձանագրում է վիճակագրությունը, ամենևին էլ ձեռքբերումների դաշտում չէ»,- եզրափակեց Զոյա Թադևոսյանը: