Բացառիկ սելավից` մինչև նոր ցիկլոնի մոտեցում. Գագիկ Սուրենյան (տեսանյութ)

Ինչպիսի՞ն կլինի հուլիս ամիսը Հայաստանի համար, արդյոք հրաժեշտ տվեցի՞նք տեղումներին և ցիկլոններին, առաջիկա 5 օրվա և հուլիս ամսվա ընդհանուր բնութագրի մասին «Անդրադարձ» մամուլի ակումբում խոսեց ՀՀ ԱԻՆ «Հիդրոմետ» ծառայության օդերևութաբանության կենտրոնի պետի տեղակալ Գագիկ Սուրենյանը.

«Մինչ կանխատեսումներին անցնելը` ես ուզում եմ ամփոփել հունիս ամիսը: Հունիս ամսին խիստ անկայուն եղանակ էր, որը շարունակվեց մինչ ամսվա վերջ: Տեղումների մեծ քանակությամբ աչքի են ընկել Շիրակը, Լոռին և Տավուշը: Հունիսի առանձնահատկությունն այն էր, որ անձրևները գրեթե բոլոր տեղերում ուղեկցվում էին կարկուտով: Արթիկում տեղացած սելավը բացառիկ էր, վերջին 40-50 տարվա ընթացքում նման բան տեղի չէր ունեցել: Գրեթե նույն երևույթն է կատարվել Վարդենիսի Կարճաղբյուր գյուղում»,- ասաց բանախոսը:

Գագիկ Սուրենյանը նշեց, որ հուլիս ամիսը կրելու է տարբեր նկարագիր: Արարատյան դաշտում, Արմավիրում տեղումների քանակը նորմայի սահմաններում է: Սյունիքի մարզում տեղումների քանակը նորմայից պակաս է լինելու: Ամսվա առաջին օրերին գիշերը կարող է նվազել 16-17 աստիճանով: Մայրաքաղաքում տեղումների քանակը կլինի նորմայի սահմաններում:

Այսօր սպասվում է հունիս ամսվա ամենաբարձր ջերմաստիճանը` մինչև 38 աստիճան:

«Սկսած վաղվանից Սև ծովից մեր տարածք է գալիս ցիկլոնային դաշտ: Այդ ցիկլոնն ունի այնպիսի առանձնահատկություն, որ ակտիվանալու է երեկոյան ժամերին: Լոռիում, Տավուշում, և Շիրակում ցիկլոնն ավելի վառ կարտահայտվի, տեղումները կսկսվեն ոչ թե երեկոյան, այլ կեսօրից հետո:

Հուլիս 1-5-ն օդի ջերմաստիճանը կնվազի: 5-ից հետո ջերմային փոփոխություններ չեն լինի: Սովարաբար, այս եղանակին ցերեկային ժամերային պետք է խուսափել արեգակի ուղիղ ճառագայթներից, քանի որ դրանք վնասակար են առողջության համար, ինչպես նաև խուսափել ալկոհոլային խմիչքներից, և օգտագործել հնարավորինս շատ հեղուկներ»: