ԱԺ-ն ամբողջությամբ ընդունեց Ընտրական օրենսգրքում փոփոխությունների նախագիծը

Ազգային ժողովն այսօրվա նիստում երկրորդ ընթերցմամբ և ամբողջությամբ ընդունեց քաղաքական համաձայնության արդյունքում Ընտրական օրենսգրքում փոփոխություններ և լրացումներ կատարելու մասին օրենքի նախագիծը:

Կողմ քվեարկեց 104 պատգամավոր, դեմ՝ 5, ձեռնպահ 2 պատգամավոր:

Հունիսի 16-ին ԸՕ-ի շուրջ 4+4+4 ձևաչափով քննարկման մասնակից խորհրդարանական քաղաքական ուժերը՝ ՀՀԿ-ն, ՀԱԿ-ը, ՕԵԿ-ը, ԲՀԿ-ն և ՀՅԴ-ն ստորագրել են հայտարարություն, որով հաստատել են Ընտրական օրենսգրքում փոփոխություններ կատարելու վերաբերյալ ձեռք բերված համաձայնությունը: Ընտրական օրենսգրքում առաջարկվող փոփոխությունների նախագիծն ընդգրկված էր կառավարության հրավիրած արտահերթ նստաշրջանի օրակարգում:

Ֆինանսական միջոցներ չպահանջող փոփոխություններն ուժի մեջ կմտնեն օրենքի ընդունվելուց հետո 10 օրվա ընթացքում, իսկ  ֆինանսական միջոցների ներգրավում ենթադրող դրույթները կհամարվեն պայմանական և այդ միջոցները չգտնելու դեպքում չեղյալ կհամարվեն: Փոփոխությունները կատարելու համար կպահանջվի 16 միլիոն եվրո, որից 3 միլիոնը տրամադրելու պատրաստակամություն է հայտնում կառավարությունը: Ընտրական օրենսգրքում փոփոխություններ իրականացնելու վերաբերյալ համաձայնություն ձեռք բերած քաղաքական ուժերը հայտարարությամբ դիմել են դոնոր կազմակերպություններին՝ ֆինանսական միջոցներ տրամադրելու հարցով:

ԸՕ-ում առաջարկվող փոփոխություններով նախատեսվում է ներդնել ընտրողների մատնահետքերով գրանցման համակարգ, ինչի համար մինչ քվեարկությունը բոլոր ընտրողները պետք է նախագրանցվեն և ստանան նույնականացման քարտեր: Նախատեսվում է բոլոր ընտրատեղամասերում տեղադրել տեսախցիկներ և ապահովել ընտրական գործընթացի ուղիղ հեռարձակում: Առաջարկվող փոփոխություններով ընտրական գործընթացին մասնակից քաղաքական ուժերի համար առավել մատչելի են դարձվում ընտրություններին մասնակցած քաղաքացիների ցուցակները: Վերջին փոփոխությունն ու ժի մեջ կմտնի օրենքի ընդունումից հետո՝ անկախ ֆինանսական միջոցների առկայությունից: