Սեզամ, բացվի′ր. Լարսը փակ է

Արդեն մի քանի օր է` Լարսի անցակետը փակվել է եղանակային պայմաններից ելնելով: Հայաստանից Ռուսաստան արտահանվող բեռների մի մասը դեռևս մնացել է Լարսում:

Նշենք, որ դեռևս Լարսի անցակետ տանող փլուզված ճանապարհին իրավիճակը մնում է անփոփոխ, վթարավերականգնողական աշխատանքները շարունակվում են, ստեղծվել է 2 վրանային ավան` նախատեսված 70 մարդու համար: Փորձում են ՌԴ սահմանային անցակետում գտնվող ՀՀ քաղաքացիներին օդանավով Հայաստան տեղափոխելու ուղղությամբ:

Նախօրեին Հյուսիսային Օսիայում առկա են եղել տրանսպորտային միջոցների և մարդկանց կուտակումներ՝ մոտ 200 բեռնատար, 40 մարդատար ավտոմեքենա` 77 ուղևորով և 2 ավտոբուս՝ 88 ուղևորով, հաղորդվել է նաև Վլադիկավկազ քաղաքի մոտ գտնվող Ռեդանտ կոչվող տարածքում կուտակված շուրջ 50 բեռնատարի մասին:

Հիշեցնենք, որ հունիսի 23-ին` ժամը 16.40-ի սահմաններում, Վրաստանի ՆԳՆ ԱԻ դեպարտամենտից տեղեկություն էր ստացվել, որ Վերին Լարսի անցակետից մոտ 2 կմ հեռավորության վրա (Վրաստանի տարածքում), Թերեք գետի վարարման հետևանքով ավտոճանապարհի 500-600 մ հատված ամբողջովին փլուզվել է, և այդ պատճառով փակվել է ՌԴ-Վրաստան սահմանային անցակետը:

Վերին Լարսը Հայաստանը Ռուսաստանին կապող միակ ավտոմայրուղին է, որով էլ տեղի են ունենում ՀՀ-ՌԴ ելքն ու մուտքը: Անցակետի փակվելն այս պահին իրենից ենթադրում է հատկապես արտահանողների համար լուրջ խնդիրներ, քանի որ այս պահին ընթանում է ծիրանի, նաև լոլիկի արտահանում, որոնք, ի դեպ, շուտ փչացող պտուղներ են, ապա արտահանողներին Եվրասիական որևէ երկիր հասնելու համար մնում է ընտրել Սև ծովը:

Թեև լաստանավեր են վարձակալել` Փոթիից Նովոռոսիյսկ հասնելու համար, սակայն արտահանողների աշխատանքը բարդացել է նաև ֆինանսական առումով: Եվ թե այդքանից հետո որքան կարժենա լոլիկի և ծիրանի ինքնարժեքն արտահանողների համար, այս հարցը դեռևս չի քննարկվում, որը սակայն ոչ պակաս կարևոր է: Հենց այս հանգամանքով է պայմանավորված լինելու` կարտահանվի՞ լոլիկն ու ծիրանը ՌԴ, թե՞ ոչ:

Թեև այսօր ի պատասխան Newspress.am-ի` Լարսի շուրջ ստեղծված իրավիճակի վերաբերյալ հարցի` Գյուղատնտեսության փոխնախարար Ռոբերտ Մակարյանը նշեց, որ երկու օր պարբերականությամբ տեղի են ունենում լաստանավային փոխադրումներ: Նաև վարորդներին են տեղափոխում, սակայն պարզ է, որ գյուղմթերքի արտահանման համար դժվար ժամանակներ են սկսվել:

Մակարյանը նաև հավելեց, որ լաստանավերով փոխադրումն առայժմ միակ այլընտրանքային տարբերակն է:

Հավելենք, որ ՀՀ փոխվարչապետ Վաչե Գաբրիելյանն այսօր լրագրողների հետ զրույցում, պատասխանելով հարցին, թե արդյոք 45 օր Լարս անցակետի փակ մնալն աղետալի ազդեցություն չի՞ ունենա գյուղատնտեսության վրա, նշեց, որ անում են հնարավորինը, որպեսզի արագացնեն Լարսի անցակետի բացումը:

Newspress.am