Դատական «հումանիզմը» Չիլինգարյանի դեպքում գործեց, Շիրխանյանի դեպքում՝ ոչ

Գեներալ-մայոր Մելսիկ Չիլինգարյանը կալանքից ազատվել է: Պատճառն առողջական խնդիրներն են: Վերջինս մեղադրվում է ՀՀ քրեական օրենսգրքի 375 հոդվածի 2-րդ մասով նախատեսված արարք կատարելու մեջ:

Գեներալ-մայորը հունիսի 3-ին կալանավորվել է, հունիսի 4-ին՝ տեղափոխվել Երևանի կայազորային հիվանդանոց: Մի քանի ամիս առաջ մեկ այլ հանգամանքներում ձերբակալվեց նաև պաշտպանության նախարարի նախկին տեղակալ Վահան Շիրխանյանը, ով նույնպես ուներ առողջական խնդիրներ, սակայն վերջինիս պատիժը թեթևացնելու ոչ մի քայլ չձեռնարկվեց: Newspress.am-ը կապ հաստատեց քաղտեխնոլոգ Արման Բադալյանի հետ, ով վերոնշյալ փաստն այսպես մեկնաբանեց.

«Քանի որ Վահան Շիրխանյանը չի հանդիսանում ներկայիս իշխանությունների թիմակիցը, և նրա հետ ֆինանսական շահեր չունեն, դրա համար նրա վրա չի տարածվում կալանքը փոխելու վերաբերյալ այդ որոշումը: Իսկ գեներալի վրա տարածվում է, քանի որ գեներալին ինչի համար որ մեղադրում են, խիստ կասկածելի է, որ նա մենակ է այդ յուրացումներն արել: Այդ իսկ պատճառով նրա վրա տարածվում է դատական այդ «հումանիզմը», իսկ մնացած գործիչների վրա, ովքեր փորձել են տոնածառ դնել նոր տարուն, կամ ասենք փայտերով ինչ որ հեղափոխություն անել, նրանց վրա չի տարածվում: Քանի որ Հայաստանում դատական համակարգ գոյություն չունի, և դատական գործընթացը շատ վաղուց վերածվել է ընդամենը քաղաքական բեմականացման, այդ իսկ պատճառով քննարկել դրա իրավական կողմը, իմաստ չունի» :

Անդրադառնալով Պաշտպանության նախարար Սեյրան Օհանյանի` պաշտոնաթողության վերաբերյալ արված հետևյալ հայտարարությանը, թե «Հայաստանի պաշտպանության նախարարը երբեք չի հրաժարվի հայրենիքին իր ծառայությունները մատուցելուց», Արմեն Բադալյանն ասաց. «Եթե ինչ-որ մեկն ուզում է իրեն աշխատանքից ազատեն, խնդիր չկա, բայց նախարարը երբեք իր սեփական դիմումի համաձայն չի հրաժարվի այդ պաշտոնից»: