Ջերմոցի տակ 40 աստիճան է և ավելին, բայց պիտի աշխատեմ. նախկին ջերմոցատեր

«Օրը երեք հազար դրամով գնում, աշխատում եմ ջերմոցում, պոմիդոր եմ հավաքում, ելարանով պոմիդորի երկար տունկերը ուղղում եմ, անպիտան տերևները կտրում-հանում, իսկ ծաղկած շրջանում՝ փոշոտում եմ անում»,- Newspress.am-ին ասաց Արարատի մարզի բնակչուհի Ռուզանը:

Տիկին Ռուզանը ջերմոցներ ուներ, թեև շատ մեծ չեն, սակայն պիտանի են օգտագործման: Այժմ չի մշակում: Նախ չի կարողանում ոռոգել, քանի որ արտեզյան հորից արդեն ջուր ստանալ չի կարողանում, այն խորացրել էր մինչև 12 մետր, սակայն դարձյալ ջերմոցները չի կարողանում ոռոգել՝ ջրի հոսքը թույլ էր:

Վերջին տարիներին ջերմոցներում լոլիկ էր մշակում, բերքից գոհ էր, սակայն այսօր արդեն աշխատում է հարևան համայնքի խոշոր ջերմատանը, որտեղ նույնպես լոլիկ են մշակում:

«Օրը երեք հազար դրամ փող են տալիս, արևի տակ աշխատում ենք` ժամը վեցից մինչև վեցը, կես ժամ ենք նստում-հանգստանում, արևի տակ, բայց պիտի աշխատենք»,- ասում է Ռուզանն ու ամեն անգամ հիշում է իր ջերմոցները, որտեղ կարող էր բանջարեղեն մշակել, սակայն այժմ չի կարողանում:

«Ես իմ բերքն ունեի, գիտեի` իմն է, ինձ հսկող չկա, կեսօրվա շոգին չեմ աշխատում, ոչ մի ջերմոցում չեն աշխատում, որովհետև անհնար է, սակայն այս ջերմոցում պիտի աշխատեմ, իսկ ջերմոցի տակ մինչև 40 աստիճան ու ավելի բարձր է»,- ասում է նա:

Տիկին Ռուզանը նաև նշում է, որ ջերմոցներում հյուրեր են ունեցել, իտալացիներ են եկել և ասել, որ 70 հազար դոլարով կարող են 3 հազար ք/մ ջերմոց կառուցել, որը հագեցած կլինի ժամանակակից բոլոր անհրաժեշտ սարքերով՝ ապահովելով կաթիլային ոռոգում և այլն: Նաև հավելում է, որ իտալացիները հպարտացել են, որ Հայաստանում շատ ջերմոցներ են կառուցել:

Ռուզանը նշում է, որ այսօր իր նման շատերն են, ովքեր չեն կարողանում տարբեր պատճառներով մշակել սեփական ջերմոցներն ու գնում են աշխատելու խոշոր ջերմոցներում, որն, իհարկե, պատկանում է ապահովված խավին:

Նշենք, որ գյուղատնտեսության նախարարությունը հաղորդում է , որ այսօրվա դրությամբ Հայաստանում շահագործվող ջերմատնային տնտեսություններում լոլիկի տարածքներն, ըստ օպերատիվ տվյալների, կազմում են շուրջ 475 հա, որից սովորական տեխնոլոգիաներով՝ 434 հա, մեկ քառակուսի մետրի բերքատվությունը տատանվում է 8-20 կիլոգրամ, իսկ շուրջ 41 հա ժամանակակից տեխնոլոգիաների կիրառմամբ ջերմատներում` 40-50 կիլոգրամի սահմաններում։ Ջերմատներում տարեկան արտադրվում է 97.000-100.000 տոննա լոլիկ։

Գյուղնախարարությունը ևս փաստում է, որ նոր կառուցված բոլոր ջերմատները հիմնականում հագեցած են եվրոպական երկրների արտադրության նորագույն տեխնոլոգիական սարքավորումներով ու ավտոմատացված կառավարման համակարգերով: Ավելացել են բանջարեղենի արտահանման ծավալները:

Հավելենք միայն, որ ջերմատների քանակն ավելացել է, բանջարեղենի արտահանումը՝ նույնպես, սակայն շարքային ջերմոց մշակողները չեն գտնվում այս սանդղակում, քանի որ վերջին տարիներին ավելացել է մեծածավալ, ժամանակակից ջերմոցները և ունենալով ֆինանսական միջոցներ՝ կարողանում են մշակել և արտահանել, իսկ շարքային ջերմոցատերը կամ արդեն չի մշակում սեփական ջերմոցը և գնում աշխատելու մեծ ջերմոցներում, կամ էլ մշակած բանջարեղենը չի կարողանում իրացնել ՝ պայքարելով ներկրվող թուրքական բանջարեղենի հետ:

Newspress.am