Պարզ ասեք, որ այս համաձայնագրի շրջանակում չի խոցվելու ադրբեջանական ինքնաթիռ (տեսանյութ)

«Ինչո՞ւ մենք չունենք կործանիչ ավիացիա, 25 տարվա պետություն ենք: Պատգամավորները հարցեր են հնչեցնում, թե կարո՞ղ է արդյոք անհրաժեշտ իրավիճակում համակարգը չգործել: Ես ուզում եմ այդ հարցն ավելի ուղիղ տալ. դուք հիմա ակնարկում եք, որ ՌԴ-ն ունի կործանիչ ավիացիա, հակաօդային համակարգեր, և անհրաժեշտության դեպքում մենք էդ համակարգերը կարող ենք օգտագործել: Ուղիղ հարց եմ ուզում տալ, եթե ՀՀ ԶՈՒ հակաօդային պաշտպանությունից հրաման լինի ռուսական էսկադրիլիային օդ բարձրանալ, իսկ ՌԴ-ից հրաման լինի՝ պետք չի, ինքնաթիռներն օդ կբարձրանա՞ն, թե՞ չէ»,- ԱԺ արտահերթ նստաշրջանում «Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագրի քննարկման ժամանակ Պաշտպանության նախարարի տեղակալ Արա Նազարյանին հարց ուղղեց պատգամավոր Նիկոլ Փաշինյանը` հավելելով. «Պարզ ասեք, որ այս համաձայնագրի շրջանակում չի խոցվելու ադրբեջանական ինքնաթիռ, նախատեսված է օրինակ չորրորդ, հինգերորդ համաշխարհային պատերազմի դեպքերի համար, որտեղ ՀՀ-ն որևէ հետաքրքրվածություն մեծ հաշվով չունի»,-ասաց Փաշինյանը:

Փաշինյանն անդրադարձավ նաև ռուսական զենքի վաճառքի հետ կապված վարկային համաձայնագրին՝ հիշեցնելով, որ համաձայնագրի վավերացումից արդեն մեկ տարի է անցել և հետաքրքրվեց՝ կատարվե՞լ է այն արդյոք, թե՞ ոչ:

Պաշտպանության նախարարի տեղակալը պատասխանեց, որ կործանիչ ավիացիա չունենալն իր կարծիքով հնարավորությունների խնդիր է.
«Որ հնարավորություն լիներ, բնականաբար կունենայինք»,- ասաց Նազարյանը:

Խոսելով վարկային համաձայնագրի մասին` փոխնախարարը պատասխանեց, որ այն 80 տոկոսով է կատարված, իսկ պայմանագրերը կնքված են:

Նիկոլ Փաշինյանը հակադարձեց. «Կործանիչ ավիացիան ասում եք` հնարավորության հարց է, պարոնայք բարձրաստիճան և ոչ բարձրաստիճան պաշտոնյաներ, ուզում եմ ձեզ հիշեցնել, որ ձեր աշխատանքի էությունը պետության հնարավորությունները մեծացնելն է, և չկա որևէ ազդակ, հատկապես քառօրյա պատերազմից հետո, որ դուք այդ ծառայությունը կատարել եք»,- ասաց նա:

Տեսանյութը` Armtimes.com-ի