ԱԺ-ն քննարկում է ՀՀ քաղաքացիների վրա հարձակման օրը. Զարուհի Փոստանջյան

ԱԺ-ում Ընտրական օրենսգրքի շուրջ քննարկումները թեժանում են: ԱԺ պատգամավոր Զարուհի Փոստանջյանը կոչ արեց նախահարձակ լինել այդ ծրագիրը տապալելու համար: Պատգամավորի համոզմամբ` այժմ խորհրդարանը քննարկում է ներքին թշնամու կողմից ՀՀ քաղաքացիների նկատմամբ հարձակման օրը և հարձակման ձևերը, իսկ հարձակումը նախատեսվում է իրականացնել 2017 թվականի գարնանը:

«Այս ծրագիրը տապալելու համար պետք է լինենք նախահարձակ և չպետք է սպասենք հաջորդ ընտրություններին, որտեղ կրկին մեզնից կօտարեն մեր իշխանությունը: Ինքներս գնանք և վերցնենք մեզ պատկանող իշխանությունը, որն այս պահին ՀՀԿ-ի ձեռքին է, Սերժ Սարգսյանը երեկ հայտարարեց, որ ոչ միայն 2017 թվականին է մնալու և մեզնից օտարի մեր իշխանությունը, այլ նաև չի պատրաստվում հեռանալ 2017-ից հետո»: Ապա Զարուհի Փոստանջյանն անդրադարձավ կառավարության աշխատակազմի ղեկավար-նախարար Դավիթ Հարությունյանի ելույթին: Փոստանջյանն այն համոզմանն է, որ ՀՀԿ-ում խուճապ կա.

«Նա ասաց, որ ես կին եմ ու հետևաբար կնոջը նա չի պատասխանի, բայց որ տղամարդ լինեի, կփորձեր պատասխանել: Ես այստեղ ո՛չ որպես կին եմ հանդես գալիս, ո՛չ էլ` տղամարդ, քաղաքական գործիչ եմ, ով հարցեր է տալիս ու պատասխաններ ակնկալում: Հասկանալի է, որ պատասխաններ չունեք, հասկանալի է, որ դժվար է ներկայացնել մի իշխանության, ղեկավարի, որ հանձնել է հայրենի բնօրրանի տարածքները, և այդ տարածքներն, իր ձևակերպմամբ, ամայի տարածքներ են, և հայրենի բնօրրանի ազատագրումը պայմանավորեց մեր զինվորների անգին կյանքով: Հասկանալի է, որ պատերազմի առաջին օրը մեր զինվորների անգին կյանքը պաշտպանված չի եղել, տեսանյութից պարզ է, որ նրանք մենակ են եղել առաջնագծում  չեն ունեցել հրաման կրակելու: Նրանք կրակը տալը նախաձեռնել են ինքնուրույն ու ոչ միայն պաշտպանել են, որպեսզի ավելի զոհեր չունենանք, այլև կանխել են թշնամու ներկայությունը Ստեփանակերտում»,- ասաց ընդդիմադիր պատգամավորը` հիշեցնելով ՀԱՊԿ-ն ու ՌԴ-ն որևէ կերպ չարձագանքեցին ապրիլյան գործողություններին, ավելին՝ ՌԴ-ն կանխեց մեր ազատագրումը:

«Եթե դու հանդես ես գալիս պարտվողի, հող հանձնողի դիրքերից, ապա հաջորդ հարձակումն ու աղետն անխուսափելի են: Ինչպես ինքն էր ասում` ինչքան ուզենք, էնքան կխփենք, և հիմա մենք կարող ենք խփել այս հանցավոր ռեժիմին, մեզ այլ միջոց չի մնացել: Ինձ շատ հաճախ հարցնում են, թե մի տղամարդ չկա՞ այնտեղ, որ խփի նրանց, ասում եմ` կա, բայց տղամարդը …»,-ասաց Փոստանջյանը՝ չհասցնելով ավարտել միտքը. ելույթի համար հատկացված ժամանակը սպառվեց: Պատգամավորի խոսքին արձագանքեց ԱԺ փոխնախագահ Էդուարդ Շարմազանովը` հույս հայտնելով, որ վերջին երեք օրվա աղոթքներից հետո բոլորն ավելի բարիացած կլինեին: