Սամվել Բալասանյանի ու Հովիկ Աբրահամյանի տնտեսական շահերը

Սեպտեմբերին Հանրապետության մի շարք համայնքներում սպասվում են տեղական ինքնակառավարման մարմինների ընտրություններ, մի տարբերությամբ, որ Գյումրիում և Վանաձորում քաղաքապետը կընտրվի ավագանու ընտրության միջոցով: Երկու համայնքում էլ գործող քաղաքապետը, մեղմ ասած, ընտրվելու շանս չունի, քանի որ այս տարիների նրանց գործունեությունը վկայում է, որ այս պաշտոնյաներն աշխատել են յուրանձնային շահերի համար: Միայն այդ քաղաքների փողոցներով անցնելիս հասկանում ես, թե ինչ քաղաքապետ են ունեցել այս քաղաքները:

Հանրապետականը, սակայն, ի դեմ վարչապետի` շարունակում է հին մոթոդներով առաջնորդվել, թքած, որ այդ քաղաքներում կոյուղաջրերի խնդիր կա, թքած, որ երկրաշարժից 27 տարի անց անօթևան մարդիկ կան, թքած, որ մի ողջ ընտանիքի սպանությունից հետո ընդվզող գյումրեցու կողքին Բալասանյան ազգանունով քաղաքապետ չկար: Կարևորը ձայն բերող քաղաքապետ լինի, սիրաշահել ու կիսվել իմանա:

Բոլորովին վերջերս վարչապետ Հովիկ Աբրահամյանը Գյումրիում ոչ ավել ու ոչ պակաս հայտարարեց` գոհ ենք գործող քաղաքապետից:

Առաջին հայացքից թվաց, որ վարչապետի հայտարարությունը մեսիջ էր` ուղղված ընտրություններում Բալասանյանին սատարելու: Բայց պարզվում է, որ Հովիկ Աբրահամյանի հայտարարությունը տնտեսական ենթատեքստ ունի, այն է` Գյումրու համայնքին պատկանող եզակի լուրջ եկամտաբեր հաստատությունը նվիրել ՀՀ կառավարությանը. «Հիմք ընդունելով ՀՀ ՔՕ 594-րդ հոդվածը՝ Գյումրի համայնքի ավագանին որոշում է. «Շիրակ-Ջրմուղկոյուղի» փակ բաժնետիրական ընկերությունում 17.49 (տասնյոթ ամբողջ քառասունինը հարյուրերորդական) տոկոս մասնաբաժնով (23,597 հատ հասարակ (սովորական) բաժնետոմս, յուրաքանչյուրը՝ 100.000.0 (մեկ հարյուր հազար) ՀՀ դրամ անվանական սեփականություն հանդիսացող բաժնետոմսերը նվիրել Հայաստանի Հանրապետությանը՝ ի դեմ ՀՀ կառավարության»:

Ինչո՞ւ է Բալասանյանը որոշել այդքան եկամտաբեր նվիրատվություն անել, չէ՞ որ քաղաքապետ ընտրվելու համար նրան դեռ շատ փորձություններ են սպասվում: Ճակատագիրը մի քանի անգամ փոխած Բալասանյանը նախ պետք է սեփական ճակատին մի քանի կուսակցության անուն ջնջի ու ՀՀԿ դաջի, բայց արդյոք Հանրապետականը կհանդուրժի՞` նժդեհյան գաղափարները կրի նա, ով ժամանակին քայլում էր ՕԵԿ-ի հետ, ապա քաղաքական որոշ հաշվարկներից հետո սկսեց ակտիվ տարածել Գագիկ Ծառուկյանի ստեղծած ԲՀԿ-ի մանրաթելային գաղափարախոսությունը:

Ի դեպ, ՀՀԿ-ից մեզ փոխանցեցին, որ դեռ Բալասանյանը չի դիմել, երբ դիմի կուսակցությանն անդամագրվելու, այն ժամանակ կքննարկվի` որքանով է օբյեկտիվ անդամագրել կամ չանդամագրել Բալասանյան Սամվելին ՀՀԿ շարքերը: Հավանաբար, Գյումրիի գործող քաղաքապետը իր հոգու խորքում զգում է,որ իր քաղաքական շանսերն ավարտվում են և դրա համար պետք է զարկ տալ տնտեսական շահերին Հովիկ Աբրահամյանի հետ:

Newspress.am