Չարչիական հարաբերություններին գնահատական տալը բարդ է և երկրորդական. Աշոտ Մանուչարյան

ՀՀ նախագահ Սերժ Սարգսյանի` Հռոմի պապին ուղղված ելույթում նախագահն անդրադարձել էր «հայ ժողովրդի կրած դժվարություններին և  բարեկամի անտարբերությանը». «Հայ ժողովուրդն իր հազարամյա պատմական սլացքում շատ դժվարություններ է տեսել՝ ցեղասպանությունից, օտարի բռնատիրությունից ու բարեկամի անտարբերությունից մինչև ժխտողականություն»,- ասել էր Սերժ Սարգսյանն իր ելույթում:

«Ղարաբաղ» կոմիտեի անդամ Աշոտ Մանուչարյանը Newspress.am-ի հետ զրույցում՝ անդրադառնալով նախագահի այս մեջբերմանը և հարցին, թե արդյոք «բարեկամի անտարբերություն» ասվածը կապվա՞ծ է հայ ազգի դարավոր բարեկամ Ռուսաստանի հետ, ասաց.
«Հայաստանի բարձրագույն ղեկավարների պաշտոններ զբաղեցնող այրերը լավագույն ձևը չէին ընտրել նրա հետ երկխոսության վարելու: Լավագույն ձևը կլիներ նրա ուխտագնացությունն ընդունելը և խոսել մեր հազարամյակների պատմության մասին, քանի որ նա ուխտագնացութjան էր եկել: Ցավոք սրտի, մենք չկարողացանք դա դրսևորել, քանի որ մեր քաղաքական այրերն առաջնորդվում են ընթացիկ աշխարհի ընթացիկ հարցերով: Ռուսաստանը նկատի ուներ, թե չուներ, ոչինչ չի փոխվում` թե′ մեր, թե′ աշխարհի համար: Ոչ ոքի մեր թիկունքում չենք ունենա, եթե ունենք առևտրական Ռուսաստան. նրանք բոլորը չարչի են»:

Անդրադառնալով Ազգային ժողովի արտահերթ նիստում դրված` Հայաստանի և Ռուսաստանի միջև ՀՕՊ համաձայնագրին՝ Աշոտ Մանուչարյանը համարեց, որ դրան գնահատական տալը խիստ բարդ և երկրորդական է, քանի որ այդ հարաբերությունները կառուցվում են չարչիական մակարդակով. «Եթե այդ հարաբերությունները կառուցվում են չարչիական մակարդակով, դրանց գնահատականը դառնում է խիստ բարդ և երկրորդական: Կա պայմանագիրը, չկա` որևէ էական նշանակություն չունի, քանի որ մեզնից յուրաքանչյուրը պատրաստ է լինելու որևէ մանր առևտրի համար տապալել դա: Հայաստանի բարձրագույն ղեկավարության մեջ նկատում եմ մի ալիք, այն է` փողի. եթե փողը գալիս է Ռուսաստանից, ուրեմն Ռուսաստանին են սատարում,  եթե Արևմուտքից, ուրեմն` Արևմուտքին: Պապը, որ եկավ, ասաց` փողի, բիզնեսի աշխարհից մարդ չգնա իր հետ հանդիպման, քանի որ փողի աշխարհը կործանում է ամեն ինչ», – եզրափակեց Աշոտ Մանուչարյանը:

Newspress.am