Հայերի ոչնչացման վերաբերյալ, բացի ցեղասպանությունից, ես այլ բառ չգիտեի. Հռոմի պապ

Արգենտինայում, երբ խոսում էին հայերի ոչնչացման մասին, միշտ օգտագործում էին ցեղասպանություն բառը, և մայրաքաղաք Բուենոս Այրեսի Մայր տաճարում մենք խաչքար ենք տեղադրել ի հիշատակ հայերի ցեղասպանության: Ես չգիտեի այդ երևույթը նկարագրող այլ բառ: Այդ մասին Հայաստան կատարած այցից հետո իրեն ուղեկցող լրագրողների հետ զրույցում ասել է Հռոմի Ֆրանցիսկոս պապը` պատասխանալով այն հարցին, որ հունիսի 24-ին Հայաստանի նախագահի նստավայրում Հռոմի պապը շրջանցելով ծրագրված ելույթը` երկրորդ անգամ արտասանել է Ցեղասպանություն բառը:

«Երբ Հռոմ եկա, լսեցի այլ բառակապակցություն՝ «մեծ չարիք», «մեծ ողբերգություն»: Ինձ ասում էին` «ցեղասպանություն» բառը վիրավորական է: Բայց ես միշտ էլ խոսել եմ երեք ցեղասպանությունների մասին, որոնք եղել են անցյալ դարում՝ Հայոց ցեղասպանությունը, ապա Հիտլերի իրագործած ցեղասպանությունը և Ստալինի իրագործած ցեղասպանությունը»,- ասել է Հռոմի պապը:

«Անցյած տարի, երբ ես պատրաստվում էի Սուրբ Պետրոսի տաճարում անցկացվելիք հիշատակի միջոցառումներին, տեսա, որ Սուրբ Հովհաննես Պողոս Երկրորդն օգտագործել է այդ բառը, և կրկնեցի այն: Դա լավ չընդունվեց: Թուրքիայի կառավարությունը հայտարարություն տարածեց՝ իր դեսպանին հետ կանչելով Անկարա, որը վերադարձավ մի քանի ամիս անց»,- ասել է Ֆրանցիսկոս պապը:

«Իմ ելույթում այդ բառը չկար, բայց երբ լսեցի Հայաստանի նախագահի ելույթի տոնը, իմ կողմից շատ տարօրինակ կհնչեր, եթե ես չասեի նույնը, ինչ մեկ տարի առաջ»,- ասել է Ֆրանցիսկոսը: