Հայ արտահանողները՝ խնդրի առջև. Լարսը փակ է

Հայաստանում սկսվել է ծիրանի արտահանման գործընթացը: Սակայն, ինչպես երևում է, խնդիրներ են առաջացել Լարս անցակետում
Վրաստանի ենթակառուցվածքների նախարարության ճանապարհային դեպարտամենտից ՀՀ տրանսպորտի և կապի նախարարությանը տեղեկացնում են, որ հունիսի 24-ին` ժամը 10.00-ի դրությամբ, հորդառատ անձրևներից առաջացած սողանքավտանգ իրավիճակի և գետի վարարման պատճառով, Ստեփանծմինդա-Լարս ավտոճանապարհը փակ է բոլոր տեսակի տրանսպորտային միջոցների համար:

Իսկ այդ ընթացքում Հայաստանում ծիրանն արդեն հասել է, և այս պահին արտահանման խոչընդոտները լուրջ հարված կհասցնեն ոլորտին: Թեև ծիրանն արտահանվում է հատուկ բեռնատար մեքենաներով, սակայն լինելով նուրբ միրգ` ծիրանը տևական ժամանակ մնալով նման մեքենաների մեջ, հայտնի չէ, թե ինչ ապրանքային տեսք կունենա՝ հասնելով իրացման կետեր: Բացի այդ, հայտնի չէ, թե որքան Լարսը կմնա փակ:

Նշենք, որ հայկական ծիրանի հերթական խմբաքանակն ուղևորվում է Մոսկվա, Պետերբուրգ, Եկատերինբուրգ ու Ռուսաստանի հեռավոր այլ քաղաքներ:

ՀՀ գյուղատնտեսության նախարարությունը տեղեկացնում է` պտուղ-բանջարեղենի արտահանումների գործընթացն անխափան իրականացնելու նպատակով «Սպայկա» ընկերությունը վարձակալել է երեք լաստանավ, որոնցով «Փոթի» նավահանգստից երկու օրը մեկ պարբերականությամբ բեռնափոխադրումներ կիրականացվեն դեպի Նովոռոսիյսկ և հակառակ ուղղությամբ:

Առաջին բեռնափոխադրումը կիրականացվի հունիսի 25-ին` երկու ուղղություններով: Առաջարկվում է արտահանողներին օգտվել վերոնշյալ այլընտրանքային ուղուց, որը շուրջ 300 կմ-ով կրճատում է ընդհանուր ճանապարհը:

Նշենք, որ նման առաջարկը նախ երկու կողմից կարելի է դիտարկել, անհատներ ունեն սեփական մեքենաները, որոնցով գյուղմթերք են տեղափոխում ՌԴ, թե ինչպես է կարգավորվելու այս հարցը, ինչպես են օգտվելու մեկ այլ փոխադրամիջոցից և լրացուցիչ վճարելու պատրաստ են, թե ոչ. սրանք հարցեր են, որոնք միայն գրելով չի լուծվի:

Ուղղակի փաստ է, որ մասնավոր արտահանողները խնդիրներ ունեն և խոստացված ԵԱՏՄ մեծ շուկան հայ արտադրողների և արտահանողների համար կախված է Լարսից և տարածաշրջանի եղանակից, ոչ թե եվրասիական արտոնություններից: