Հռոմի պապի այցն ու ՀՀԿ ապաշխարանքը

Րոպեներ հետո Հռոմի Սրբազան Քահանայապետ Ֆրանցիսկոս Պապը կլինի Հայաստանում: Կաթոլիկ եկեղեցու հովվապետերից առաջինը Հովհաննես Երկրորդ պապն էր, որ այցելեց Հայաստան: Ի դեպ, այդ այցը բավական անշուք անցավ: 15 տարի հետո առաջին քրիստոնյա երկիր է ժամանում Հռոմի Ֆրանցիսկոս պապը:

Հռոմի Ֆրանցիսկոս պապի 2015 թվականի պատարագը ցնցեց աշխարհն ու խաղաղության և հանդուրժողականության յուրօրինակ կոչ դարձավ։ Նա, մասնավորապես, ասաց, որ անցյալ դարում մարդկության ընտանիքն անցավ երեք զանգվածային ու աննախադեպ ողբերգությունների միջով, որոնցից առաջինը համարվող ցեղասպանությունը հարվածեց հայերին:

Եվ հիմա, Պապի այցը նոր որակ է հաղորդում Հայաստանին, որում իր մեծ դերակատարությունն ունի Սերժ Սարգսյանի փեսան` Վատիկանում ՀՀ դեսպան Միքայել Մինասյանը, ով հավուր պատշաճի կազմակերպել է այս այցը: Որոշ գնահատականներով` Պապի այցը կարևոր է քաղաքական, հոգևոր-մշակութային և տնտեսական առումներով:

Մոտ 600 լրագրող է հավատարմագրվել` լուսաբանելու Հռոմի Ֆրանցիսկոս պապի այցը Հայաստան։ Նրանց թվում կան նաև միջազգային հեղինակավոր լրատվամիջոցներ, իսկ դա նշանակում է, որ մի քանի օր միջազգային լրատվամիջոցներով Հայաստանի անվան շրջանառությունն ապահովված է:

Ենթադրվում է, որ Հռոմի պապի հետ Հայաստան կժամանի ավելի քան 3 հազար ուխտավոր, ինչն աշխուժություն կապահովի Հայաստանի զբոսաշրջության ոլորտում, իսկ նրանց ծախսած գումարները կաշխուժացնեն նաև տնտեսությունը:

ՀՀԿ փոխնախագահ էդ. Շարմազանովն էլ այս այցը կարևորել է ոչ միայն հոգևոր, այլև աշխարհաքաղաքական առումով. «Սա խաղաղություն կբերի տարածաշրջանին, սա ևս մեկ անգամ միասնության կոչ է բոլոր քրիստոնյա ժողովուրդներին և ևս մեկ անգամ վերահաստատում է՝ Հայաստանն ուխտագնացության երկիր է, հայ ժողովուրդն է առաջինն ընդունել Քրիստոսի Ավետարանը», ասել է Շարմազանովը:

Հայ ժողովուրդն էլ իր սպասելիքն ունի Հռոմի պապից`ակնկալելով, որ Պապի այցն ու աղոթքն արդարամտության նշույլ կցողի ՀՀԿ գործելաոճի մեջ, ՀՀԿ-ն կապաշխարհի ու կհեռանա քաղաքական դաշտից` հայ ժողովրդին ազատելով իր իսկ պարտադրած աղքատությունից, հալածանքից ու թշվառությունից: