Երևանն առաջատարն է թմրանյութ օգտագործողների թվով

Հայաստանում վերջին 3 տարում թմրամիջոցի օգտագործման 9 տոկոս աճ է նկատվում: Այդ մասին «Անդրադարձ» մամուլի ակումբում նշեց ՀՀ ԱՆ գլխավոր նարկոլոգ Պետրոս Սեմերջյանը` հավելելով, որ Հայաստանում այսօր գրանցված է 5828 թմրամոլ, որից 88-ը կանայք են, 11-ը անչափահաս, նրանցից 3-ը` 16-17 տարեկան:

«Սա հաշվառված ցուցանիշ է: 2011թ-ին կատարված հետազոտության արդյունքում պարզվել է, որ Հայաստանում մոտ 30 000 հազար մարդ զբաղվում է թմրամոլությամբ: Թմրամոլությունը միջգերատեսչական խնդիր է. բոլոր գերատեսչություններն ունեն իրենց անելիքը»,- ասաց Սեմերջյանը:

Ըստ Սեմերջյանի` աշխարհի գրեթե բոլոր երկրներում թմրամիջոցի օգտագործման աճ է նկատվում, բացառությամբ Շվեդիայի, որտեղ թմրամոլությունը կանգ առած վիճակում է` ի հաշիվ կրթական ծրագրերի: Հայաստանում նույնպես կրթական ծրագրեր իրականացվում են, սակայն չկա որևէ հաշվարկ, թե այդ ծրագրերն ի վերջո օգնո՞ւմ են, թե՞ պարզապես չեն ներազդում այն հանգամանքի վրա, որ մենք տարեկան ունենք թմրամիջոցի օգտագործման 9 տոկոս աճ: Ամենաբարձր ցուցանիշը գրանցված է Երևանում` 3007 թմրամոլ, 2-րդ տեղում Արմավիրի մարզն է` 727, և 3-րդ տեղում` Կոտայքի մարզը` 542 գրանցված թմրամոլով:

Ի դեպ, Հայաստանում թմրանյութի օգտագործումն ապաքրեականացված է, մինչդեռ կան երկրներ, որտեղ խիստ պատժամիջոցներ են կիրառվում: Օրինակ` ամեն տարի հունիսի 26-ին` Թմրամիջոցի չարաշահման ապօրինի շրջանառության դեմ պայքարի միջազգային օրը, Չինաստանում մոտ 60 թմրամոլ հրապարակային գնդակահարվում է: