Արծվիկ Մինասյանը Սուրիկ Խաչատրյանին արտոնություն տվեց

Այսօր կառավարության նիստի օրակարգում ընդգրկված էր «Խաչատրյան Եղբայրներ» սահմանափակ պատասխանատվությամբ ընկերության կողմից ապրանքների ներմուծման դեպքում մաքսային և հարկային մարմինների կողմից հաշվարկված ավելացված արժեքի հարկի գումարների վճարման ժամկետը երեք տարի ժամկետով հետաձգելու մասին որոշման նախագիծը:

«Խաչատրյան Եղբայրներ» ընկերության կողմից իրականացվող ներդրումային ծրագրի շրջանակներում 2016 թվականի մայիսի 12-ից մինչև 2016 թվականի օգոստոսի 31-ը ներառյալ ներմուծվող ապրանքների` մաքսային և հարկային մարմինների կողմից հաշվարկվող ավելացված արժեքի հարկի վճարման ժամկետը հետաձգվում է ներմուծման հայտարարագրման օրվանից հաշված 3 տարի ժամկետով:

«Խաչատրյան Եղբայրներ» ՍՊ ընկերության նպատակն է ՀՀ Սյունիքի մարզի Ծղուկ համայնքում կառուցել 4 մգվտ փոքր հիդրոէներգոկասկադ: Նախատեսվում է ներդրումներ իրականացնել շուրջ 1.9 մլրդ ՀՀ դրամի չափով, որից մոտ 489 մլն ՀՀ դրամը սարքավորումներ ձեռք բերելու համար:

Ընկերությունը ներկրելու է չինական արտադրությամբ ժամանակակից սարքավորումներ:

Ներդրումային ծրագրի իրագործման արդյունքում կստեղծվի մոտ 14 աշխատատեղ` միջին աշխատավարձը կազմելով 2016թ.– 120, 2017թ.- 130 և 2018թ.-140 հազ. դրամ: Նախագիծը ներկայացրեց էկոնոմիկայի նախարար Արծվիկ Մինասյանը: