Սերգո Կարապետյանը կախվել է գինեգործության փրփուրներից

Կառավարությունն այսօրվա նիստում որոշեց Հայաստանի խաղողագործության և գինեգործության հիմնադրամ ստեղծել: Գյուղատնտեսության նախարար Սերգո Կարապետյանն ասաց, որ որոշվում է 2016 թվականի ինն ամսում պետական բյուջեով նախատեսված կառավարության պահուստային ֆոնդից հատկացնել 103 մլն 500 հազար դրամ:

Սերգո Կարապետյանը նշեց, որ խաղողագործության և խաղողի հումքով ոգելից խմիչքների արտադրության ոլորտներում վերջին տարիներին իրականացված բազմաբնույթ և մեծածավալ աշխատանքների շնորհիվ նկատվում են խաղողի արտադրության վերականգնման և գինեգործության զարգացման ակնհայտ միտումներ, սակայն ոլորտներում առկա հիմնական խնդիրների վերլուծությունը ցույց է տվել, որ անհրաժեշտ է իրականացնել ներկա իրավիճակի բարելավմանն և հնարավորությունների ամրապնդմանն ուղղված լուրջ քայլեր:

Նշենք, որ այս տարիներին խաղողագործությանը` որպես այդպիսին, առանձնապես ուշադրություն չի դարձվել, իսկ այն, որ աշնանը գյուղնախարար Սերգո Կարապետյանը մասնակցում է այս կամ այն գինեգործական ընկերության մթերմանը, կամ գործարանի բացմանը, դեռ չի նշանակում, որ ոլորտը կայուն զարգանում է և գտնվում է պետական հոգածության ներքո:

Գինեգործության շղթայում ամենախոցելին խաղողագործներն են, և հատկապես այս տարվա իրավիճակը ցույց տվեց, որ գինեգործները կարող են լուծել իրենց խնդիրները, աղքատ չեն և ընդհանրապես աղքատները չեն զբաղվում դրանով: Իսկ ովքեր զբաղվում են, ցանկացած պահի կարող են խաղողագործներին չվճարել, կամ վճարելուց գին թելադրել, պատրաստեն անորակ գինի՝ գցելով հայրենի արտադրության հեղինակությունը: Կարճ ասած` գինեգործների շարքում կան գործարարներ, որոնց ոչ թե գինու որակը կամ երկրի հեղինակությունն է կարևոր, այլ սեփական գրպաններն ամեն գնով լցնելը:

Իսկ այս ամենը գյուղնախարարության հնարավորությունների սահմաններից դուրս է, իսկ ի՞նչ կտա հիմնադրամը, կօգնի՞ արդյոք զարգացնելու խաղողագործությունն ու գինեգործությունը, թե՞ կվերածվի սովորական փող կլանող կառույցի:

Չի բացառվում, այս այսկերպ Սերգո Կարապետյանը փորձում է ոլորտը կարգավորել, սակայն հիմնադրամ ստեղծելով ոլորտի կուտակված խնդիրները չեն լուծվելու. խաղողագործները քանդում են խաղողի այգիները, նրանց խաղողի մթերման դիմաց չեն վճարել, արտագաղթում են, սորտաթարմացում չի արվել: Այնպես որ` խնդիրների այս փունջը հիմնադրամը չի լուծելու, եթե լուծվող հարցեր լիներ՝ նախարարն արդեն կատարել էր, հիմնադրամը փրփուրից կախվելու միջոց է, որից էլ նախարարը կախվել է: