Հովիկ Աբրահամյանը շնորհակալ է հրազդանցիներին. փող տվեց

Վաղը կառավարությունը վարչապետ Հովիկ Աբրահամյանի` հրազդանցիներին տված` շենք-շինությունների, մուտքերի, վերելակների վերանորոգման խոստման համաձայն` վերաբաշխում է կատարելու 2016թ-ի բյուջեում:

Կառավարությունը Կոտայքի մարզի Հրազդան համայնքի մի շարք բազմաբնակարան շենքերի բակերի ասֆալտապատման և վերելակների վերանորոգման նպատակով Հայաստանի Հանրապետության 2016 թվականի պետական բյուջեով նախատեսված կառավարության պահուստային ֆոնդից Հայաստանի Հանրապետության Կոտայքի մարզպետարանին 2016 թվականի ինն ամսում հատկացնել 150 մլն դրամ, որից 120 մլն դրամ` Հրազդան համայնքի մի շարք բազմաբնակարան շենքերի բակերի ասֆալտապատման համար, 30 մլն դրամ` Հրազդան համայնքի որոշ բարձրահարկ շենքերի վերելակների վերանորոգման համար:

Հիւշեցնենք, որ օրերս Հրազդանում վարչապետը հանդիպել է քաղաքի Կենտրոն թաղամասի բազմաբնակարան շենքերի բնակիչների հետ: Նրանք դժգոհել էին, թե շենքային բակերի, թե տանիքների և վերելակների խնդիրներից:

Վարչապետը, արձագանքելով հրազդանցիների բարձրացրած խնդիրներին, նշել էր, որ կառավարությունն առաջիկայում կքննարկի և միջոցներ կհատկացնի Հրազդանին:

Ի դեպ, Հովիկ Աբրահամյանը նաև հանձնարարել է Հրազդանի քաղաքապետին՝ ուշադրության կենտրոնում պահել քաղաքի խնդիրները և հետևողական լինել դրանց լուծման հարցում:

Հիշեցնենք, որ բոլորովին վերջերս Հրազդանում քաղաքապետի ընտրություններ էր, և տարիներ շարունակ վերընտրվող քաղաքապետ Արամ Դանիելյանը քաղաքի բարեկարգման համար գրեթե ոչինչ չէր արել, երևի հույսը Հովիկ Աբրահամյանն էր, ով կգա, կասի և փող կտա և ցուցում, որ քաղաքը կարգի բերվի:

Իսկ թե մինչ այդ որ կողմ էին նայում քաղաքապետի աչքերը, կամ նայում ու չէին տեսնում Հրազդանի մշտենջենական քաղաքապետի բազմազբաղ աչքերը, հայտնի չէ: Փաստ է, սակայն, որ Հովիկ Աբրահամյանը Արամ Դանիելյանի հերթական վերընտրության համար շնորհակալ եղավ հրազդանցիներին, որ այս անգամ ևս Արամ Դանիելյանի պահով հրազդանցիներն ամոթով չթողեցին ՀՀԿ-ին: Որպես շնորհակալություն` 150 մլն դրամ: