Ես չեմ հասկանում «Ժառանգության» վերջին տարիների զիգզագները. Ստյոպա Սաֆարյան

«Ես բացարձակապես` որևէ ձևով, որևէ առնչություն չեմ ունենում «Ժառանգություն» կուսակցության գործունեության հետ հետ»,- Newspress.am-ի թղթակցի հետ զրույցում ասաց քաղաքագետ Ստյոպա Սաֆարյանը:

«Այն պահից ի վեր, երբ ես սկսեցի զբաղվել բացառապես իմ հետազոտական ինստիտուտով, քաղաքականության վրա ազդում եմ միայն այդ ինստիտուտի միջոցով: Ես ո′չ առնչություն ունեմ «Ժառանգության» կայացրած որոշումների հետ, ո′չ էլ որևէ առնչություն ունեմ»,- ասաց Սաֆարյանը:

Հարցին, թե Ստյոպա Սաֆարյանը նախկին գործընկերների հետ արդյոք պահո՞ւմ է հարաբերությունները, թե՞ ոչ, քաղաքագետը պատասխանեց, որ «Բարև Երևանում» դեռ աշխատում է նախկին թիմակիցների հետ, թեպետ բոլորի հետ չեն պահվում հարաբերությունները, բայց նշեց, որ ո′չ Րաֆֆի Հովհաննիսյանի, ո′չ էլ որևէ թիմակցի հետ ոչ մի վեճ և խոսակցություն չի ունեցել: Շեշտեց՝ բոլոր հոդվածները, որ տեղ գտան ընդդիմադիրից մինչև այլընտրանքային ԶԼՄ-ներում, որևէ ձևով չեն համապատասխանում իրականությանը:

Ասել, թե կամուրջներն այրված են «Ժառանգություն» խմբակցության հետ, քանի որ եթե չկա շփում, ուրեմն չկան նաև հարաբերություններ, Ստյոպա Սաֆարյանը միանշանակ չպատասխանեց, սակայն նշեց, որ ինքը չի հասկանում «Ժառանգության» վերջին տարիների քաղաքական զիգզագները: Նախկին Ժառանգականն ասաց, որ խմբակցությունում կան անդամներ, որոնց հետ հարաբերությունները շատ սովորական և նույնիսկ սառն են:

Խորհրդարանական ընտրություններին մասնակցելու և քաղաքական որևէ ուժի հետ համագործակցելու հետ կապված` Ստյոպա Սաֆարյանն ասաց, որ այդ հարցերի շուրջ մտածելու նույնիսկ ժամանակ չունի, չի կարող ո′չ հերքել, ո′չ հաստատել: «Ժառանգության» մասնակցության պարագայում էլ շեշտեց, որ եթե ցանկություն լինի, կաշկանդող հարցեր քիչ կան.

«Ես հիշեցրի, որ մեծամասնության հետ ունեմ լավ հարաբերություններ, եթե ցանկություն ունենամ հետ գնալու, հավատացեք, որ ինձ կաշկանդող հարցեր քիչ կան: Պարզապես ես այլ պատկերացումներ ունեի կուսակցության գործունեության վերաբերյալ: Խնդիրը ոչ թե միջանձնային դաշտում է, այլ այն, թե ինչ է ուզում անել «Ժառանգությունը», անհասկանալի, ինչ-որ տեղ նաև անընդունելի որոշումներ, որոնք, իմ կարծիքով, թուլացրին կուսակցության դիրքերը քաղաքականության մեջ: Ես երկու բան եմ իմացել, որ «Ժառանգությունն» ունի բարձր հեղինակություն երկու բանի պատճառով, մեկն իր իմիջն է, որն ապահովել է թիմը, մյուսը՝ այն ֆունկցիան, որ նա կատարում է դաշտում: Կոնցեպցիան փոխվեց 2012թ. խորհրդարանական ընտրություններում: Իմ նախկին որոշ գործընկերներ, օրինակ` Ռուբեն Հակոբյանը, ասում էր այն, ինչ-որ անում է «Ժառանգությունը», լուրջ չէ»:

Դիտարկմանը, թե Ռուբեն Հակոբյանին շատ են կապում իշխանական թևի հետ, Ստյոպա Սաֆարյանն ասաց.

«Կարող եմ ասել, որ Ռուբեն Հակոբյանն անդամակցել է կուսակցությանը` չկիսելով այդ կուսակցության և′ գործունեության ձևը, և′ արտաքին, և′ ներքին հարցերում առանցքային դիրքորոշումներ: Ուզում եմ ասել, որ խախտվեց կուսակցության իմիջը և ֆունկցիան»:

Գուցե Րաֆֆի Հովհաննիսյանի քաղաքական ոչ ճիշտ կամային հատկությունների՞ արդյունք էր դա, հարցինք Սաֆարյանին, նախկին ժառանգականն ասաց.

«Կարծում եմ, որ Րաֆֆի Հովհաննիսյանի հարգանքը կուսակցության ներսում միշտ եղել է բավարար, որպեսզի կուսակցությունը քննարկում անի: «Ժառանգությունը» հրաժարվեց այն ամենից, ինչ անում էր մինչ 2012թ., բայց նաև հստակ ծրագրեր չդրեց, թե ինչ պետք է անի: Ես չեմ մասնակցի մի տեղ, որտեղ ո′չ ֆունկցիան է հստակ, ո′չ իմիջն է այն, ինչ ես եմ պատկերացնում: Գնաս և մաս կազմես մի բանի, որը չես կիսում, որ ի՞նչ անես»: